Бүтүн Арассыыйатааҕы патриотическай пуорумҥа 10 тыһ. тахса киһи кыттыаҕа

Ахсынньы 9 күнүгэр диэри Арассыыйа 45 эрэгийиэнигэр Бүтүн Арассыыйатааҕы патриотическай пуорум эрэгийиэннээҕи бырагыраамата ыытылла турар. Тэрээһиннэргэ 10 тыһыынчаттан тахса киһи — оскуола үөрэнээччилэрэ, устудьуоннар, патриотическай кулууптар уонна «Бастакылар хамсааһыннарын» активистара, ону таһынан байыаннай сулууспалаахтар дьиэ кэргэттэрэ кытталлар.

Росмолодёжь «Роспатриоткиинин» салайааччытын э.т. Дмитрий Степыко бэлиэтииринэн, бырагыраама иккис сылын ыытыллар. Тэрээһиннэр түмэллэргэ, ыччат кииннэригэр уонна «Арассыыйа» национальнай киин филиалларыгар бараллар.

«Биһиги сорукбут – патриотическай иитиини хас биирдии эрэгийиэҥҥэ тиэрдии. Арассыыйа норуоттарын сомоҕолоһууларын сылыгар бу ураты суолталаах: устуоруйа ыарахан кэмнэригэр биһиги мэлдьи бииргэ буоларбыт, түмсүүлээх буолуу — биһиги сүрүн күүспүт», – диэн эттэ кини.

Бырагыраама Санкт-Петербург куораттан саҕаланна. Онно 400-тэн тахса киһи кыттыылаах «Зарница 2.0» байыаннай-патриотическай оонньууну уонна ыччаты дойду олоҕор кыттыһыннарыыны дьүүллэстилэр.

Пуорум үс сүрүн хайысхата

1. «Өйдөбүл уонна суол» (Память и путь) — устуоруйаҕа, дьон дьылҕатыгар уонна ааспыт кэм инникини кытта ситимигэр аналлаах.
2. «Хорсун быһыы уонна сулууспалааһын» (Подвиг и служение) — дойдуга бэриниилээх буолуу, дьоруойдар холобурдарын уонна уопсай дьыалаҕа кылааты киллэриини кэпсиир.
3. «Сомоҕолоһуу уонна сыаннастар» (Единство и ценности) — Арассыыйа норуоттарын түмэр култуураны уонна үгэстэри харыстааһыҥҥа болҕомтону уурар.

Тэрээһиннэри тэрийиигэ Арассыыйа Култууратын уонна Оборуонаҕа министиэристибэлэрэ, эрэгийиэннэр ыччакка биэдэмистибэлэрэ кытталлар. Ону таһынан «ВОИН» киин, «Өлбөт үйэлээх полк», Көрдүүр хамсааһын, Кыайыы волонтердара уонна ДОСААФ күүс-көмө буолаллар.

Бүтүн Арассыыйатааҕы патриотическай пуорум түмүк тэрээһинэ ахсынньы 8–11 күннэригэр Москваҕа «Арассыыйа» национальнай кииҥҥэ буолуоҕа. Пуорум Владимир Путин сорудаҕынан үлэлиир «Ыччат уонна оҕолор» национальнай бырайыак чэрчитинэн ыытыллар. Бу тэрээһин дойду патриоттарын бииргэ түмэр сүрүн түһүлгэтинэн буолуоҕа.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.

Сиһилии: https://www.sakha.gov.ru/news/68170