Бүтүн Арассыыйатааҕы “Ты в игре” успуорт бырайыактарын куонкуруһа саҕаланна

Бүтүн Арассыыйатааҕы “Ты в игре” успуорт бырайыактарын куонкуруһун үбүлүөйдээх бэһис тэрээһинигэр сайаапкалары ылыы саҕаланна. Сайаапканы 2025 сыл кулун тутар 14 күнүгэр диэри туталлар.

“Дойду Бэрэсидьиэнэ Владимир Путин сорудаҕынан 2030 сылга Арассыыйа олохтооҕун 70% итэҕэһэ суох эти-хааны эрчийиинэн, успуордунан утумнаахтык дьарыктаныахтаах. Бу соругу ситиһэргэ “Ты в игре” куонкурус көмөлөһөр. Тэрээһин номнуо бэһис сылын субуруччу ыытыллар итиэннэ хас сырыы ахсын кыттыан баҕалаах элбээн иһэр. 2020 сылтан Арассыыйа бары эрэгийиэннэриттэн барыта 16 тыһ. сайаапка киирбитэ. Үбүлүөйдээх сылга өссө элбэх киһи, саҥа успуорт хайысхалара кыттыа, көрөөччү сэҥээриэ диэн эрэнэбит” – диэн Арассыыйа Бырабыыталыстыбатын бэрэссэдээтэлин солбуйааччы Дмитрий Чернышенко бэлиэтээтэ.

“Ты в игре” куонкурус сүрүн соруга – Арассыыйа олохтоохторун көхтөөх хамсаныыга, чөл олоххо сирдиир чаҕылхай уонна туһалаах успуорт көҕүлээһиннэрин булуу уонна бэлиэтээһин.

Барыта аҕыс номинация баар. Сүрүн номинациялар — «Точка старта», «Масштаб», «Дети в спорте» «Трансформация в спорте», «Безграничные возможности». Куонкуруска бииргэ үлэлэһээччилэр номинациялара — «Корпоративный спорт», «Спортивный туризм», «Медиа».

Хас биирдии сүрүн номинация кыайыылаахтара бэйэлэрин бырайыактарын сайыннаралларыгар 300 000 солк. туттарыллар. Онтон бастыҥ бырайыак – гран-при 1 000 000 солк. ылар.

Куонкуруска 18 саастарын туолбут, Арассыыйа олохтооҕо, ону тэҥэ, 18 саастарыгар диэри оҕолор кыттыылаах успуорт бырайыактарын олоххо киллэрэр юридическай сирэйдэр, урбаанньыттар  кыттар бырааптаахтар. Сайаапканы ыытар туһугар тывигре.рф саайтка киирэн толорор ирдэнэр. Сиһилии иһитиннэрии куонкурус  тывигре.рф официальнай саайтыгар баар.