«Чурапчы үйэттэн үйэҕэ» диэн кинигэ сүрэхтэннэ

Бүгүн Дьокуускайга ыытылла турар “Алаас ахтылҕана” Чурапчы улууһун күннэрин чэрчитинэн “Бэчээт дьиэтигэр” Чурапчы нэһилиэгин 375 сылыгар анаммыт үөрүүлээх тэрээһин буола турар. Чуолаан, “Чурапчы үйэттэн үйэҕэ” кинигэ сүрэхтэниитэ. Көрсүһүүгэ кэлбит ыалдьыттары ыалдьытымсах буолуу сиэрин көрдөрөн, сахалыы таҥастаах Далбар хотуттар кымыһынан, алаадьынан күндүлээтилэр.

“Кинигэ тахсыыта сүрүн сорукпутунан буолбута. Дьон-сэргэ уопсастыбаннас элбэх үлэни көрүстэ. Кинигэбитигэр хайаан даҕаны үчүгэйдик олорор бас-көс ыалларбытын, дьоруой ийэлэрбитин уо.д.а. киллэриэххэ диэн быһаарсыбыппыт. Чурапчы киэн туттар дьонун туһунан бу кинигэ кэпсиэҕэ”, — диэтэ бэйэтин киирии тылыгар көрсүһүү кыттыылаахтарын эҕэрдэлээн туран, “Чурапчы нэһилиэгэ” МТ баһылыга Владимир Сивцев.

Чурапчы улууһун социальнай олоҕо-дьаһаҕа уонна экэниэмикэтэ сайдыытыгар дьоһун кылаатын киллэрбит, өйөбүл буолбут, бу улуустан төрүттээх сенатор Егор Борисов аатын киэн тутта уонна махтана ааттаатылар.

Нэһилиэк баһылыга Владимир Дмитриевич наҕараадалары Акулина Кузьминаҕа, Наталья Поповаҕа,  Федор Чичигинаровка, Федора Седалищеваҕа, Виктор Дьяконовка, Лена Керемясоваҕа туттарда.

Улуус баһылыга Степан Саргыдаев көрсүһүүгэ кэлбит дьону-сэргэни кинигэ сүрэхтэниитинэн истиҥник эҕэрдэлээтэ.

— Чурапчы улууһугар үгүс нэһилиэк кинигэтэ таҕыста. Хайахсыт, Одьулуун… Онон Чурапчы нэһилиэгин устуоруйата киириэхтээх, эмиэ сырдатыллыахтаах диэн санаанан салайтаран, сүрдээх үчүгэй, дуоспуруннаах кинигэ күн сирин көрдө. Устуоруйаттан саҕалаан күн бүгүн үлэлии-хамсыы сылдьар дьоҥҥо тиийэ сырдатылынна. Олус сиэдэрэйдик оҥоһуллубутун бэлиэтиибин. Чурапчыбыт сайдыытын туһугар сыралаһан үлэлээччилэргэ махтанабын. Гаастааһын, аспаалы тэлгэтии, суол-иис, киин болуоссаты оҥоруу уо.д.а. сайдыы боппуруостарын болҕомтоҕо тутабыт, — диэн туран Степан Саргыдаев оройуон дьаһалтатын аатыттан наҕараадалары Акулина Кузьминаҕа, Наталья Поповаҕа уо.д.а. туттарда.