Чурапчыга бааһынай хаһаайыстыбаны тэрийиигэ субсидия харчытын иҥэриитэ билиннэ

Чурапчы улууһун борокуратуурата Чурапчы улууһун олохтооҕо бааһынай хаһаайыстыбаны тэрийиигэ уонна сайыннарыыга анаммыт үбү-харчыны иҥэрбитин уонна атын сыалга туһаммытын туһунан холуобунай дьыалаҕа буруйдуур түмүктэри бигэргэттэ.

Бу туһунан СӨ Борокуратуурата суруйар. Бааһынай хаһаайыстыба салайааччыта РФ Холуобунай Кодексатын 3 ч.160 ыст. буруйданар. Силиэстийэ көрдөрүүтүнэн, буруйданааччы СӨ Тыатын хаһаайыстыбатын министиэристибэтин кытта дуогабар түһэрсэн, «Агростарп» гранынан бааһынай хаһаайыстыбаны тэрийиигэ уонна сайыннарыыга субсидия ылбыт.

Субсидия сорҕотун, чуолаан 380 тыһ. солк.,  бэйэтин наадатыгар туһаммыт, ону таһынан отчуоттуур кэмҥэ министиэристибэҕэ сымыйа дуогабардары туттарбыт. Буруйдаах холуобунай дьыалата суут көрүүтүгэр ыытылынна.