Чурапчыга сүппүт булчуту көрдүүллэр

Чурапчытааҕы көрдүүр-быыһыыр этэрээтин үс быыһааччыта 37 саастаах сүппүт булчуту көрдүү таҕыстылар. Бу туһунан Саха сиринээҕи Быыһыыр сулууспатыгар иһитиннэрдилэр.

Эр киһи ааспыт нэдиэлэҕэ, алтынньы 2 күнүгэр, сүппүт. Кини Мырылаҕа дьиэтиттэн киэһэ тахсан, билиҥҥэ диэри дьиэтигэр төннө илик.

Нэһилиэк баһылыга этэринэн, кини доҕотторун кытары бултуу барсыбыт. Аара суолга тыраахтырдара алдьаммыт. Ол иһин сүппүт эр киһи саппаас чаас ыла дьиэтин диэкки айаннаабыт. Кини оҥочонон Амма эбэни туораабыт уонна тырааныспары хаалларбыт сиригэр диэри сатыы барарга санаммыт. Кэлин доҕотторо эбэ кытылыгар оҥочону эрэ булбуттар. Кинилэр сатыы тыраахтырга диэри тиийбиттэр да табаарыстарын булбатахтар.