Дьааҥыга 9 ойуур баһаара тахсыбыта бэлиэтэннэ

Дьааҥыга ыам ыйын 4 күнүнээҕи туругунан 9 ойуур баһаара регистрацияламмыт. Уопсайа 2400 га иэннээх сиргэ уот турбут.

Улууска ураты баһаарынай эрэсиим үлэлиир. Бу туһунан СӨ Суһал ыстаабын пресс-сулууспата иһитиннэрдэ.

Ойуур баһаара Томмот сэлиэнньэтиттэн 10 уонна 19 километр ыраах сиргэ бэлиэтэммит. Нэһилиэнньэлээх пууҥҥа куттал суоһаабат. Билигин уоту бохсууга 37 Авиалесоохрана баһаарынайа үлэлиир.

Маны сэргэ «Якутлесресур» эбии бөлөҕүн кытары СӨ Экология, айылҕаны туһаныы уонна ойуур хаһаайыстыбатын министиэристибэтин ойууру харыстааһыҥҥа уонна чөлүгэр түһэриигэ департаменын салайааччыта Николай Никитин көттө. Ааспыт сууккаҕа Өймөкөөн оройуонугар биир ойуур баһаара тахсыбыта бэлэиэтэммит. 44 гектар иэннээх сиргэ турбут уоту алта «Якутлесресур» үлэһиттэрэ оперативнайдык умуруорбуттар.