2-с Күүлэккэ дьикти көтөрү ким туппутуй?

Бэҕэһээ Бүлүү улууһун 2-с Күүлэтин олохтоохторо хаһан да көрбөтөх көтөрдөрүн булбуттарын туһунан сурах тилийэ көппүтэ. Ол кэннэ «Саха сирэ» саайка 2-с Күүлэт нэһилиэгин олохтооҕо Данил Федотов дьикти көтөрү туппутун туһунан хайдах баарынан кэпсээтэ.

«Муус устар 21 күнүгэр сарсыарда 9 чаас ааһыыта хотоммор үлэлии сылдьан, тиэргэним күрүөтүн аттыгар ытым оҕото тугу  эрэ көрдүүр курдук хаары  сытырҕалыы сылдьара. Ону бастаан аахайбатаҕым. Кэлин ону-маны үлэлии түһэн  баран көрбүтүм, ытым тугу эрэ кытта оонньуу сылдьара. Ыраахтан көрдөхпүнэ кутуйах туппут ди санаабытым, онтум  улахан соҕус хара көтөр үллэн олороро. Чугаһаан көртүм, отой да атын  харамай эбит. Тиийэн тутан  ылтым, ыты кытта охсуһара сүрдээх этэ.

Ытым да оҕо буолан, тута сатаабат, хата оонньуу сатыыра. Туох дьиибэ көтөрө хантан кэлэн хаалтын дьиктиргии, соһуйа көртүм. Ол турдахпына  сылгы аһатан ааһан иһэр Петров Константиҥҥа  көрдөрбүтүм. Кини хаартыскаҕа түһэрбитэ. Онтон дьиэбэр туох көтөрө буоларын куйаар ситимигэр көрөөрү илдьэ кэлбитим. Оҕолорбор көрдөрбүтүм. Олус кырыктаах көтөр  этэ. Киһини кытта охсуһара, тоҥсуйара.  Куйаар ситимигэр «Камышница» диэн көтөр буоларын быһаарбыппыт.

Отой да соҕуруу дойду көтөрө эбит. Хайдах манна бу биһиги  дойдубут  хаарынан бүрүллэн турдаҕына кэлэн хаалбыта биллибэт. Ону маны аһатан көртүм да, аһаабатаҕа. Кыната да бүтүн курдуга. Кыратык көтөр этэ. Атаҕар от күөх өҥнөөх быа баайан  баран, дьиэм кэтэҕэр таһааран ыытан кэбиспиппит. Кыратык көтө  түһэн баран, көтөрбүт хаарга түспүтэ. Хааман баран, хаартан тугу эрэ булан сии-сии, хаамар сүүрэр ыккардынан хара тыа диэкки бара турбута. Ол кэннэ көрбөтөхпүт. Хайдах бу дьикти көтөрү көрбүппүн, туппуппун уонна айылҕаҕа  ыыппыппын туһунан баары-баарынан кэпсээтим».

Данил Федотов, 2-с Күүлэт нэһилиэгэ, Бүлүү улууһа.