Дмитрий Песков Владимир Путин Саха сиригэр кэлэрин туһунан иһитиннэрдэ

РФ Бэрэсидьиэнэ Владимир Путин Саха сиригэр кэлэрэ былааннаммыт, хаһан кэлэрин Кириэмил иһитиннэриэҕэ.

Бу туһунан  пресс-сэкиритээр Дмитрий Песков суруналыыстарга иһитиннэрбитин туһунан ТАСС суруйар.  «Былааҥҥа турар. Болдьоҕо биллибэт, ол туһунан иһитиннэриэхпит», — диэн Песков эппит.

Санатар буоллахха,  Владимир Путин Уһук Илиҥҥэ сылдьар кэмигэр быйыл тохсунньуга Саха сиригэр кэлэрин былааннаабыта. Ол эрээри, күн-дьыл туругуттан сылтаан кэлбэтэҕэ. Кини хайаан да Саха сиригэр кэлиэм диэбитэ.  Кулун тутарга Владимир Путин СӨ Ил Дархана Айсен Николаевтыын көрсүбүтэ.