Дьокуускайдааҕы мэдиссиинэ кэллиэһэ Бүтүн Арассыыйатааҕы күрэскэ бастаата

В.А.Вонгродскай аатынан Дьокуускайдааҕы мэдиссиинэ кэллиэһэ “Орто сүһүөх  исписэлиистэр мэдиссиинэҕэ уонна фармацияҕа” диэн Бүтүн Арассыыйатааҕы билим-быраактыка II кэмпириэнсийэтин  “Идэҕэ эрдэттэн туһаайыы үлэтин тэрийиигэ уонна бүтэрээччилэри үлэҕэ киллэрии бастыҥ быраактыката” номинацияҕа бастакы миэстэни ылла.

Кэмпириэнсийэ Москваҕа буолан ааста. Дириэктэр Дмитрий Афанасьевич Алексеев салайааччылаах кэлэктиип идэҕэ эрдэттэн туһаайыы, бэлэмнээһин уонна бүтэрээччилэри үлэҕэ киллэрии моделын билиһиннэрдэ.

Күрэскэ кыайыы, систиэмэлээх сыһыан, саҥаны киллэрии уонна кэлэктиип көдьүүстээх үлэтин түмүгүнэн ситиһилиннэ. Тустаах уопуту Арассыыйа 456 мэдиссиинэҕэ кэллиэһигэр тарҕатар былааннаахтар. Бу туһунан Үөрэх уонна билим министиэристибэтин пресс-сулууспата сырдатар.