Дьокуускайга куруолуктар ыттартан нэһиилэ быыһаннылар

Дьокуускай киинигэр түөрт куруолук тымныыттан уонна бэйдиэ сылдьар ыттартан куотан, уулуссаҕа турар туалекка саспыттар. Бу туһунан кыыллары көмүскээччи Злата Сычева телеграм-ханаалыгар суруйбут:

— Куруолуктар эрэйдээхтэр бачча тымныыга хайдах, хантан куоппуттарын билбэппин. Миэхэ биир тэрилтэ үлэһиттэрэ түннүк нөҥүө куруолуктар сүүрэкэлии сылдьалларын көрөн сибээскэ тахсыбыттара.

Билиҥҥи туругунан, түөрт куруолугу тутан «Зоополистарга» туттардыбыт. Өссө биир кулгааҕа суох куруолук хаалбытын туһунан кэпсииллэр. Ити түөрт куруолук тымныыттан эрэ буолбакка, бэйдиэ сылдьар ыттартан эмиэ куоппуттар. Тоҕо диэтэххэ, ыттар ытырбыт суоллара баар.  Биир куруолук кулгаахтара үлүйбүт. Эмтиэххэ сөп дии саныыбын.