Дьокуускайга «Пятерочка» маҕаһыына аһыллан эрэр дуо?

Дьокуускайга «Пятерочка» федеральнай ситим маҕаһыына кулун тутар ыйга «Ураса Молл» атыы-эргиэн киинигэр аһыллан эрэр, дуогабар баттаһыллыбыт, билигин онно өрөмүөн ыытылла турар диэн  SakhaDay саайт суруйар.

Ону тэҥэ, «Пятерочка» туочуката хас да сиргэ аһыллыахтаах. Холобур, «Азия» атыы-эргиэн киинигэр уонна Федор Попов уулуссатыгар баар 15 этээстээх дьиэ бастакы этээһигэр.

Саха сирин нэһилиэнньэтэ былырыын 1 мөлүйүөн ахсааны сиппитин кэннэ, улахан федеральнай ситимнээх тэрилтэлэр интэриэһиргээбиттэрэ. Кинилэргэ нэһилиэнньэ ахсаана 1 мөлүйүөн киһиттэн итэҕэс буолуо суохтаах диэн ирдэбил баар эбит. Холобур, былырыыҥҥыттан ыла «ФиксПрайс» чэпчэки сыаналаах хаһаайыстыбаннай маҕаһыыннар аһыллыбыттара.

Улахан куораттарга сылдьыбыт дьон «Пятерочка» маҕаһыыннара хас хардыы аайы баалларын, сыаналара удамырын, табаардарын арааһа элбэҕин бэлиэтии көрбүт буолуохтаахтар. Бу ситими X5 Retail Group хампаанньа салайан үлэлэтэр.

Ол эрээри, улахан эргитиилээх федеральнай ситим кэлэрэ эмиэ уустуктардаах. Холобур, улахан иэннээх сөптөөх ыскылаат көстүбэккэ, «Пятерочка» маҕаһыына аһыллара тардылынна диэн суруйаллар.

Онтон чэпчэки сыаналаах, эгэлгэ табаардаах маҕаһыыннар элбээтэхтэринэ, бородууктанан эргинэр кыра тэрилтэлэргэ охсуулаах буолуон сөп. Ол эрээри, олохтоох бородууксуйа син биир хамаҕатык атыыланар.