ВИДЕО: Дьокуускайга сылаас тохтобул аанын оҕолор алдьаппыттара билиннэ

Дьокуускай Гагаринскай уокуругар баар сылаас тохтобуллартан биирдэстэрин кимнээх урусхаллаабыттарын полиция быһаарда. Бу туһунан Уопсастыбаннай сирдэр управлениеларын киинэ иһитиннэрэр.

Сэтинньи 20 күнүгэр Гагаринскай уокурукка турар сылаас тохтобул аанын оскуолаҕэ үөрэнэр кыыс тэбиэлээн алдьаппытын кэтээн көрөр камера устубут. Төһө сыаналаах хоромньу тахсыбытын быһаардылар.

Быраабы араҥаччылааччылар сааһын ситэ илик оҕолору уонна кинилэр төрөппүттэрин кытта кэпсэттилэр. Урусхаллааччыларга тустаах миэрэлэри ылыахтара диэн киин иһитиннэрэр.

Санатан суруйдахха, Дьокуускайга Гагаринскай уокурукка вандаллар биир күн иһигэр, сэтинньи 20 күнүгэр үс сылаас тохтобулу алдьаппыттар — Новопортовской, Гагарин искибиэрин уонна Курнатовскай уул. тохтобулларын.