Дьокуускайга сыстыганнаах ыарыылары эмтиир балыыһаны тутууну дьүүллэһэллэр

Саха Өрөспүүбүлүкэтэ сайдарыгар ордук суолталаах эбийиэктэр, ол иһигэр сыстыганнаах ыарыылары эмтиир саҥа балыыһаны тутуу, тустарынан СӨ Ил Дархана Айсен Николаев РФ бэрэсидьиэнэ Владимир Путины кытары видео-кэмпэриэнсийэҕэ кэпсэппиттэрэ.

Айсен Николаев судаарыстыба баһылыгар федеральнай киин өрөспүүбүлүкэ доруобуйатын харыстабылын сайдыытыгар оҥорор өйөбүлүн иһин махтаммыта.

«Владимир Владимирович, Саха сирин нэһилиэнньэтэ өйөбүлгүт иһин махтанар. Кэнники алта сылга биһиги мэдиссиинэ бөдөҥ эбийиэктэрин: Перинатальнай, Сүрэх-тымыр, Онкология кииннэрин туттубут. Арай биир тиийбэт звенобутунан сыстыганнаах ыарыыларга өрөспүүбүлүкэтээҕи балыыһабыт буолар. Биһиги бырайыагын оҥорбуппут, эспэртиисэни ааспыппыт. Билигин бу боппуруоһу өссө көтөҕүөхпүтүн, эһиги өйөбүлгүтүнэн туһаныахпытын баҕарабыт», -– диэн эппитэ.

Владимир Путин көрсүһүү кэмигэр киирбит боппуруостары барытын РФ бырабыыталыстыбата көрөрүн, үөрэтэрин туһунан эппитэ.

СӨ доруобуйа харыстабылын миниистирэ Лена Афанасьева икки бэрэсидьиэн көрсүһүүтүгэр «Доруобуйа харыстабыла» бырайыак инники соруктара чопчу бэлиэтэммиттэрин туһунан эттэ.

«РФ бэрэсидьиэнин өйөбүлүнэн Саха сиригэр социальнай эбийиэктэри тутуу салҕанара уонна мэдиссиинэ биир наадалаах тэрилтэтин -– сыстыганнаах ыарыылар балыыһаларын тутуу саҕаланара ордук үөрдэр. Владимир Владимирович ону таһынан мэдиссиинэ үлэһиттэригэр хамнаһы үрдэтэр соругу туруорда. Онон сотору кэминэн эбии төлөбүрдэр ааҕыллыахтара, бу эмчиттэри тыа сиригэр сыһыарарга улахан суолталаах. Билигин мэдиссиинэҕэ перинатальнай, оҕо, акушер-гинекология сулууспаларын модернизациялааһыҥҥа саҥа соруктар тураллар. Бу биир кэлим үлэ түмүгүнэн биһиги нэһилиэнньэ олоҕун хаачыстыбата үрдүүрүн, өрөспүүбүлүкэ демографияҕа көрдөрүүтэ туруктаахтык тупсарын ситиһиэхтээхпит», -– диэтэ Лена Афанасьева.

СӨ Доруобуйа харыстабылын министиэристибэтин штаты таһынан кылаабынай инфекциониһа, мэдиссиинэ наукатын доктора, ХИФУ Мэдиссиинэ институтун сыстыганнаах ыарыыларга, фтизиатрияҕа уонна дерматовенерологияҕа кафедратын сэбиэдиссэйэ Снежана Слепцова:

«Көрсүһүүгэ сыстыганнаах ыарыылар балыыһаларын тутуу боппуруоһа турбута олус суолталаах. Билиҥҥи кэмҥэ патогеннай вирустар саҥа көрүҥнэрэ үөскүүллэр. Киһи аймахха сыстыганнаах ыарыылар кутталлара саҥа таһымҥа тахсар, онно бэлэм буолуохха наада. Онтон доруобуйа харыстабылын систиэмэтэ бэлэм буолуута үчүгэй килиниичэскэй уонна научнай базаҕа төрүттэниэхтээх. Ил Дархан бэлиэтээн эппитин курдук, баар кыахпыт билиҥҥитэ тиийбэт. Сыстыганнаах ыарыылар балыыһалара оҕолорго уонна улахан дьоҥҥо көмөнү оҥорор мэдиссиинэ анал тэрилтэтинэн буолуоҕа. Баар кыахпыт тиийбэтин, итэҕэһин пандемия эмиэ көрдөрдө. Саҥа балыыһаны сэбилииргэ сүрүнэ -– биллэн турар, элбэх чахчыны быһаарар үчүгэй лабораториялар баар буолаллара. Ол, бастатан туран, эрэгийиэҥҥэ эпидемиологическай куттал суох буолуутун хааччыйыы», -– диэн эрэгийиэн сыстыганнаах ыарыылары эмтиир балыыһаҕа наадыйыыта олус үрдүгүн бэлиэтээтэ.

Дьокуускай куорат Думатын дьокутаата, Дьокуускай куорат 2 №-дээх балыыһатын кылаабынай бырааһа Саргылаана Васильева балыыһа тутулларыгар сир учаастага Петр Алексеев аатынан уулуссаҕа анаммытын туһунан иһитиннэрдэ.

СӨ Ил Дарханын уонна бырабыыталыстыбатын пресс-сулууспатын матырыйаалынан