Дьокуускайга учаастактан хаары суолга таһаарар бобуулаах

Киин куоракка саас хаар ханна түбэһэринэн таһааран ыһар билигин сатаммат.

2021 сыл бэс ыйыгар Дьокуускай куорат Думатын дьокутааттара куораты тупсарыы саҥа быраабылатын бигэргэппиттэрэ, онно сөп түбэһиннэрэн «Промышленнай» уокурук Сэбиэскэй Армия 50 сылын уулуссатыгар турар туһааннаах полигоҥҥа тиэйэн таһааралларыгар бигэргэппиттэрэ. Итиннэ хаары ханнык баҕарар кээмэйинэн босхо түүннэри-күнүстэри ылаллар, оттон быраабыланы кэһээччилэр мөлүйүөнүнэн суумалаах ыстараап төлүөхтэрэ.

— Ким эрэ бэйэтин учаастагын тас өттүгэр суолга хаары таһаардаҕына,  уокурук хаары таһар эбээһинэстээх, ол эрээри буруйу оҥорооччу ыстаарап төлүөҕэ. Баҕа өттүнэн буолбакка, суут нөҥүө», – диир «Дьокуускай куорат» куораттааҕы уокурук административнай хамыыһыйатын салайааччыта Феликс Антонов.

Холобур, СӨ Административнай буруйу оҥоруу Кодексатынан бастакы кэһиигэ биирдиилээн дьон 1-3 тыһ. солк., иккис түбэлтэтигэр – 3-5 тыһ. солк., бастакы кэһиигэ  дуоһунастаах үлэһиттэргэ уонна урбааннарга -10-30 тыһ. солк., иккис түбэлтэтигэр 30-50 тыһ. солк., юридическай сирэйдэргэ бастакы кэһиигэ 50-500 тыһ. солк. уонна иккис түбэлтэтигэр 500 тыһыынчаттан 1 мөл. солк. диэри ыстаарааптаналлар.

Быйыл туһааннаах сокуону кэһэр буруйданааччы ахсаана улаатарын кэтээн көрөллөр.Хаар уулла илик, ол эрээри билигин номнуо барыта 163 боротокуол оҥоһуллубута биллэр. Биллэн турар, тиэхиньикэнэн хаар таһыытын сыаната чэпчэкитэ суох – биир массыынаҕа ортотунан 8 тыһ. солк. Оччотугар кыаллыбат буоллаҕына, ким баҕалаах бэйэтин уокуругун салайар дьаһалтатыгар тахсыахтарын сөп диэн yakutia-daily.ru суруйар. Маны таһынан инбэлииттэр, үлэ бэтэрээннэрин сайаапкаларынан хаары босхо таһыы өҥөтө оҥоһуллар. Оттон массыынаҕа хаары тиэйиигэ сорох кэмҥэ волонтердары ыыталлар эбит.