«Доруобуйа күнэ» аахсыйаны дьон сэргээтэ

Саха сиригэр доруобуйаны бөҕөргөтүүгэ уонна доруобуйа харыстабылын систиэмэтин сайдыытыгар анаан 2021-2030 сылларга биллэриллибит Доруобуйа уон сылын тэрээһиннэрин олоххо киллэриигэ туһуламмыт үлэ быйыл иккис сылын ыытыллар.

Аан дойдутааҕы доруобуйа күнүгэр анаммыт нэдиэлэҕэ кыттыһан, СӨ Дьахталларын сойууһун көҕүлээһининэн муус устар 9 күнүгэр «Нефрология уонна диализ аныгы киинэ» ХЭУо уонна элбэх хайысхалаах өҥөнү оҥорор “Фемели клиник” салалталарын кыттыһыннаран, холбоһуктаах “Доруобуйа күнэ” аахсыйаны тэрийдилэр.

Өрөспүүбүлүкэтээҕи дьахталлар уопсастыбаннай тэрилтэлэрин садайааччыта Анжелика Андреева бу тэрээһин туһунан санаатын маннык үллэһиннэ:

— Билиҥҥи кэмҥэ доруобуйа киһиэхэ хаһааҥҥытааҕар да күндү буолла. Ордук дьахтар аймахха, олоҕу дьолунан толорор, иэримэ дьиэни иччилиир, тулалыыр эйгэ кэрэтин иҥэрэр ураты аналлаах дьоҥҥо, доруобуйабытын бөҕөргөрүү – сүрүн сорукпут. Биһиги туох-ханнык иннинэ тус бэйэбит уонна үүнэр көлүөнэбит доруобай, чөл олохтоох буоларын ситиһиэхтээхпит. Онон бары бииргэ ылыстахпытына бу сорук туолуоҕа диэн бигэ эрэллээхпин. Ол инниттэн Доруобуйа нэдиэлэтин чэрчитинэн икки бөдөҥҥ мэдьиссиинэ тэрилтэтин холбоон, бу улахан тэрээһини тэрийдибит. Киһи үөрүөҕэ, олус элбэх ийэ оҕолорун кытта, үгүс ыал аҕаларын, эбээлэрин, эһээлэрин илдьэ кэлэн көрдөрдүлэр. Эмчиттэр  уопсайа 360 киһини көрбүттэригэр-истибиттэригэр барҕа махталбытын тиэрдэбит.

Нефрология уонна диализ аныгы киинин дириэктэрэ Марфа Бурцева тэрээһин туһунан бу курдук билиһиннэрдэ:

— “Фемели клиник” доруобуйа харыстабылын тэрилтэтин салайаччыта Алена Сенькинаны кытта биһиги өрүү бииргэ үлэлиибит. Онон бу да сырыыга дьон доруобуйатын бөҕөргөтүүгэ туһуламмыт Доруобуйа уон сылын тэрээһиннэрин өйүүр өрөспүүбүлүкэтээҕи суолталаах тэрээһиҥҥэ кыттыһан, босхо аахсыйаны ыыттыбыт. Тэрээһини бииргэ ыытар туһунан СӨ  Дьахталларын сойууһун бэрэссэдээтэлэ Анжелика Андреева этии киллэрбитэ. Уопсайа 72 киһи суруттаран, сүрүн быраастарга көрдөрөн, салгыы эмтэнэргэ сүбэ-ама ылла. Түгэнинэн туһанан, терапевт Виктория Поисееваҕа, педиатр Елена Хрюкинаҕа, ревматолог Ольга Марковаҕа, эндокринолог Ольга Макароваҕа, уролог Прокопий Давыдовка, нефролог Татьяна Корниловаҕа аахсыйаҕа кэлэн кыттыбыттарыгар истиҥник махтанабыт.

«Доруобуйа күнэ» босхо аахсыйаҕа кыттыбыт куорат олохтооҕо Светлана Гаврильева санаатын маннык үллэһиннэ:

— Мин поликлиникабар баран анаан уочараттаан бырааска көрдөрөөрү сылдьыбытым. Дьолго, саамай наадыйар нефролог, эндокринолог, уролог быраастарым көрөллөрүн истэн баран, тугу барытын быраҕан туран сүүрэн кэлбитим. Бу маннык быраастарга толуон олох көстүбэт, уһун уочарат буолан, хас да күнү быһа кэтэһэргэ тийэҕин.  Дьон батсааптан билэн кэлбиттэр. Уочараттаах эрээри, киһи быраастан бырааска  наадатын быһаарсан тахсар усулуобуйатын бэркэ тэрийбиттэр. Уопуттаах быраастарга көрдөрөн, олус астынан баран эрэбин. Онон бу аахсыйа ыытылларын көҕүлээбит дьахталлар өрөспүүбүлүкэтээҕи сойуустарыгар барҕа махталбын тиэрдэбин. Аны да бу курдук дьахталларга олус наадлаах тэрээһиннэри ыыта туралларыгар баҕарабын!

Ити курдук, киин куорат үгүс олохтооҕо олус наадыйар бырааһыгар сылдьан, салгыы эмтэнэригэр сүбэ-ама ылан, өрөбүлүн туһалаахтык атаарда.