Дьыбар тыынын бурҕатан ахсым аппыт түһүнэр

Ааспыт өрөбүллэргэ Үөһээ Бүлүү улууһун ыраах сытар Боотулуу нэһилиэгэр, сылгыһыттарга аналлаах «Дьөһөгөй оҕото» IV күрэс буолан ааста.

Баҕадьа эбэҕэ түөртүү киһилээх биэс хамаанда илин-кэлин түсүһэн биэс араас түһүмэххэ тыҥааһыннаахтык кииристэ.

Боотулуу нэһилиэгин дьоно-сэргэтэ сылгыны иитии үлэ көрүҥэ эрэ буолбатаҕын, култуурабыт, олохпут-дьаһахпыт сүнньэ, төрүт дьарыкпыт буоларын өйдөөн, сылгыһыттарга болҕомто ууран, ыччаты үгэстэргэ сыһыаран күрэхтэһиини ыыппыттара төрдүс сыллара. Сыл аайы чугастан-ыраахтан кыттааччы элбээн иһэр. Быйыл Ороһуттан тиийэ кэлбиттэр.

Быйылгы илин-кэлин түсүһүүлээх күрэскэ, тыйдары, соноҕостору уонна улахан аттары сүүрдүүгэ үһүөннэригэр кыайыылааҕынан эдэр сылгыһыт Анатолий Максимов таҕыста.

Сылгыһыттар ат сүүрдүүтүн таһынан хамаанданан хомуур хапсаҕайга кииристилэр: I м. –  Булуҥ, II м. – Толоон, III м. – Көтөрдөөх хамаандалара ыллылар.