Эбээлэр эдэр ийэлэргэ харысхал оҥорон бэлэхтээтилэр

Кэбээйи улууһун Мастаах сэлиэнньэтин Далбар хотуттара дьону-сэргэни түмэ, санааларын өрө көтөҕө, дууһаларын сылаанньыта сылдьар үтүө айылгылаах дьоннор.

Кинилэр 2019 сыллаахха түмсүүлэрин “Көмүс сүүтүк” диэн ааттаан үлэлэрин саҕалаабыттар. Салайааччылара уран тарбахтаах, хомоҕой хоһоонньут, алгысчыт Марина Даниловна Комарова буолар. Эбээлэрбит истиҥ мичээрдээх ыллыы-туойа, айа-тута сылдьар буоланнар, нэһилиэк иһигэр ыытыллар тэрээһиннэр “Көмүс сүүтүктэрэ” суох барбаттар.

Норуот айымньытын дьиэтигэр бу күннэргэ “Көмүс сүүтүктэр” түмсүү быйыл 2024 сылга төрөөбүт ийэлэргэ харысхал бэлиэтин оҥорбуттарын бэлэх ууннулар.

Аҕыйах хонугунан өрөспүүбүлүкэбитигэр Ийэ күнэ үөрүүлээхтик бэлиэтэниэ, ону көрсө эбээлэр эдэр ийэлэргэ оҥорбут бэртээхэй бэлэхтэрэ үйэ-саас тухары харысхал ымыыта буолан арчылыы сылдьыа.

Сардаана Жакипова,

Кэбээйи.