Эдэр кэрэспэдьиэннэр кынаттанар уһуйааннара  

…Субуота күн үүнэн, кыракый уончалаах уолчаан дьиэтин үлэтигэр көмөлөһө охсоот, Дьокуускайга айаннаары тиэтэйэр-саарайар.

 Кинини киин куоракка ааттаах-суоллаах муусукааннар ырыаҕа эрчийээри кэтэһэллэр. Ити курдук, Мэҥэ Хаҥалас улууһун Матта нэһилиэгиттэн айанын курулас ардах да, чысхаан тымныы да тохтоппотоҕо. Ол түмүгэр 1999 сыл сайыныгар “Хотугу сулус” өрөсөспүүбүлүкэтээҕи куонкуруска Робертино Лоретти куолаһынан “Ямайка” ырыатын ыллыыр уол киһини барытын соһуппута. Ити уолчаан Сеня Ченянов этэ. Ситиһии кынаттаммыт киһичээн “Сыл арыйыыта” бэлиэнэн наҕараадаммыта. Ити кэнниттэн Семен Чечянов араас куонкурустарга кыттыбыта, кэккэ наҕаараданан бэлиэтэммитэ, ааттаах-суоллаах муусука продюсерыгар тиийэ үүммүтэ. Ол эрээри кини «Ямайката» саха ускуустубатын устуоруйатыгар киирбитинэн эрэ буолбакка, дьон өйүгэр-санаатыгар хаалбыта.

2000 сылтан ыла, кэлиҥҥи көлүөнэ ыччат барытын да диэтэхпинэ сыыспатым буолуо,  олоҕо «Хотугу сулус» телерадиоакадемияны кытта ыкса сибээстээх. Кинилэртэн ким биллиилээх ырыаһыт буолан таҕыста, ким — үҥкүүһүт, ким —  култуура үлэһитэ, ким – суруналыыс.

“Саха” НКИХ иһинэн 7 киһи штаттаах “Хотугу сулус” оҕо телерадиоакадемиятын тэрийэр туһунан СӨ Бэрэсидьиэнэ Михаил Николаев 37-РП№-дээх дьаһала  тохсунньу 28 күнүгэр 2000 сыллаахха тахсыбыта. Бу дьоҕус тэрилтэ СӨ култууратын үтүөлээх үлэһитэ Татьяна Гоголева “Хотугу сулус” куонкуруһун ааптарскай бырайыагар олоҕуран тэриллибитэ.

2004 сыллаахха от ыйын 28 күнүгэр 711-ВП №-дээх  “Оҕолор саҥараллар” норуоттар икки ардыларынааҕы Оҕо пресс-киинин тэрийэр туһунан  дьаһал тахсыбыта. Дьэ, бу курдук улахан докумуоннарынан бигэргэтиллибит “Саха” НКИХ “Хотугу сулус” оҕо телерадиоакадемията 23 сыл ситиһиилээхтик үлэлээн кэллэ.

— “Саха” НКИХ оччотооҥҥу салайааччыта Афанасий Ноев өйөбүлүнэн  2000 сыл балаҕан ыйын 27 күнүгэр  өрөспүүбүлүкэ 10 сыллаах суверенитетын бэлиэтиир “Хотугу сулус” телерадиоакадемия «Демьян Беднай» теплоходунан «Дьокуускай-Өлүөхүмэ-Быков Мыс-Дьокуускай» маршрутунан бастакы үөрэхтээһин тууругар уу суолунан айаҥҥа туруммуппут.

“Төрөөбүт дойдубут устун” ураты тэрээһиҥҥэ 18 оройуонтан уонна Дьокуускай куораттан 25 салайааччылаах 89 эдэр кэрэспэдьиэн уһун айана тэриллибитэ. Онно оҕо быраастара, университет преподавателлэрэ, суруналыыстар, уопсастыбанньыктар барсыбыттара, — диэн ахтар Татьяна Афанасьевна.

Оттон эдэр кэрэспэдьиэннэр улуустартан саҕалаан, дойду эрэгийиэннэрин, омук сирдэрин кэрийиилэрин  туһунан киһи этэ да барбат.

Франция, Греция, Австрия, Германия, Венгрия , Япония, Кытай, Кэриэйэ — ханна-ханна тиийбэтэхтэрэй биһиги оҕолорбут!

—  2010 с. эдэр кэрэспэдьиэннэр Шанхай куоракка «ЭКСПО-2010» аан дойдутааҕы быыстапкаҕа кыттыбыттара. Онно өрөспүүбүлүкэ дэлэгээссийэтин састаабыгар киирэн, оҕолор бары сахалыы таҥастарын сайбаччы кэтэн, үс тылынан төрөөбүт дойдуларын туһунан кэпсээн-ипсээн, хомус тардан, тойуктаан, оһуохайдаан, омук дьонун соһутан, сөхтөрөн кэлбиттэрэ, — диэн бэлиэтиир «Хотугу сулус” телерадиоакадемияны төрүттээччи Татьяна Гоголева.

Оҕолору кытта өрөспүүбүлүкэ Аҕа баһылыгыттан саҕалаан, Ил Түмэн дьокутааттара, миниистирдэр, бөдөҥ тэрилтэлэр салайааччылара көрсүһүүлэрэ үгэскэ кубулуйбута.  Бу оннооҕор анал идэлээх суруналыыска да кыаллыбат боппуруоһу хайдах быһааралларын Татьяна Афанасьевна маннык ахтар:

— СӨ Бэрэсидьиэнэ Михаил Николаев бэйэтинэн өйөөн тустаах дьаһалы таһаарбыт буолан, тэрилтэбит аатын ааттаатыбыт да, биһиэхэ ханнык да салайааччы аана өрүү аһаҕас буолара. Үлэ хайысхатын торумнуу охсоот, улуустарга тахсааппытын кытта, оҕо ахсаана, докумуона барыта ситэн, биирдэ өйдөөбүппүт, биһиги иннибитигэр болокунуоттарын кыбыммытынан, уруучукаларын туппутунан кырачаан эдэр кэрэспэдьиэннэр бу баар буола түһэллэрэ. Оччолорго элбэх оҕону мунньан, доруобуйаларын чэбдигирдэн, хастыы да хонукка анаан үөрэтэр, култуурунай тэрээһиннэргэ сынньатар этибит. Билигин оҕону көҥүллэтэр докумуону толоруу уустугуран, кэккэ быһыы-майгы уларыйан, сырыы-айан аччаата.

Өр сылларга ыччаты төрөөбүт дойдутугар тапталы, бэриниилээх буолууну иҥэрэн таһаарбыт «Хотугу сулус» телерадиоакадемия эдэр кэрэспэдьиэннэри кытта айымньылаах үлэтин туһунан сиһилии «Саха сирэ» хаһыат «Манчаары» сыһыарыытыгар чэппиэрдээҕи нүөмэргэ ааҕыҥ.