«Эһэ арыылара» заповедникка үрүҥ эһэ арҕаҕа элбээбит

Саха сиригэр «Эһэ арыылара» заповедникка сыллата ыытыллар үрүҥ эһэлэр ахсааннарын учуотун оҥордулар. Учуонайдар иһитиннэрбиттэринэн, үрүҥ эһэлэр оҕолорун кытта муус устар ыйтан саҕалаан арҕахтарыттан баран эрэллэр эбит. 

Чинчийии кэмигэр исписэлиистэр 26, ол иһигэр 13 өссө да олорор арҕахтарын булбуттар. Маннык элбэх ахсаан учуот үлэтин кэмигэр үһүс төгүлүн эрэ бэлиэтэммит. Икки инники — 2011 уонна 2022 сылларга буола сылдьыбыт.

Ону таһынан учуонайдар 5 үрүҥ эһэ үөрүн уонна 17 соҕотох сылдьар эһэ суолун буллулар. Түөрт оҕолоох уонна биир соҕотох сылдьар үрүҥ эһэлэри көрбүттэр. Чинчийэр оройуоҥҥа барыта 30 тыһы үрүҥ эһэни уонна 41 кинилэр оҕолорун учуоттаабыттар.

Саамай элбэх кыыл Крестовскай арыыга — 10 төбө уонна Четырехстолбовой арыыга — 8 төбө бэлиэтэммит. Онуоха Лысов арыытыгар урут биллибэтэх үс арҕах баар эбит.