«Өлбөт үйэлээх полк» аахсыйаҕа хаартысканы босхо бэчээттээһин

Ыам ыйын 7 күнүгэр диэри Дьокуускайга «Өлбөт үйэлээх полк» хаамыыга аналлаах мэтириэттэри босхо бэчээттэтиэххэ сөп. Патриотическай аахсыйа Кыайыы күнүн көрсө Аммосов уул., 18 аадырыска баар «Мин докумуоннарым» киин офиһыгар ыытыллар.

Бу көҕүлээһин куорат олохтоохторо өйдөбүнньүк хаамыыга кытталларыгар бэлэмнэнэллэригэр уонна Аҕа дойду Улуу сэриитин кыттыылаахтарын — аймахтарын туһунан сырдык өйдөбүлү харыстыылларыгар көмөлөһөр сыаллаах. Аахсыйа чэрчитинэн мэтириэти бэйэлэрэ оҥорторор кыаҕа суох гражданнарга хаартысканы босхо бэчээттээһин көрүллэр.

«Аҕа дойду Улуу сэриитин кэмигэр Ийэ дойдуну көмүскээччилэр, тыылга үлэлээбит дьоммут туһунан өйдөбүлү харыстыыр олус суолталаах. Ийэ дойдуну көмүскээччилэр — биһиги киэн туттуубут, оттон „Өлбөт үйэлээх полк“ —  бүттүүн дойдуну, бары көлүөнэлэри бииргэ түмэр аахсыйа. Биһиги уопсай сорукпут — дьоруойдар ааттарын уонна кинилэр хорсун быһыыларын өйдүү сылдьыы», — диэн Саха Өрөспүүбүлүкэтин Ыччат дьыалаларыгар уонна социальнай коммуникацияларга миниистирэ, байыаннай дьайыы бэтэрээнэ Петр Шамаев санаатын үллэһиннэ.

Бу өҥөнөн тус бэйэлэрэ кэлэн гражданнар сорох категориялара туһаныахтарын сөп. Манна Аҕа дойду Улуу сэриитин бэтэрээннэрэ уонна инбэлииттэрэ, I уонна II бөлөхтөөх инбэлииттэр, инбэлиит оҕолор уонна кинилэри арыаллааччылар, 80 саастарын ааспыт гражданнар, байыаннай дьайыы кыттыылаахтара уонна кинилэр дьиэ кэргэттэрэ, ону таһынан элбэх оҕолоох дьиэ кэргэттэр киирэллэр.

Өҥөнү ыларга чэпчэтиилээх категорияны бигэргэтэр докумуону көрдөрүү уонна бэтэрээн хаартыскалаах электроннай файлын биэрии ирдэнэр. Тэрийээччилэр биллэрэллэринэн, файллары биэрэргэ флеш-накопителлар  ылыллыбаттар.

Санатан эттэххэ, Саха сиригэр «Өлбөт үйэлээх полк» аахсыйа быйыл эмиэ үгэс буолбут очнай көрүҥүнэн ыытыллыаҕа.

«Биһиги өрөспүүбүлүкэбитигэр „Өлбөт үйэлээх полк“ — чугас дьоммут туһунан, Кыайыы туһугар охсуспут, сэрии ыар тургутууларын ааспыт уонна дойдубутун көмүскээбит дьон туһунан тыыннаах өйдөбүл. Аҕа дойду Улуу сэриитэ хас биирдии дьиэ кэргэни таарыйбыта, ол иһин бу аахсыйа чахчы көлүөнэлэри түмэр. Ыам ыйын 9 күнүгэр, Кыайыы күнүгэр, биһиги дьоруойдарбыт мэтириэттэрин тутан, санныбытын өйөһөн, эмиэ бииргэ хаамыахпыт. Бу дойдуга барытыгар ытык күҥҥэ биһиги кыайыылаахтар көлүөнэлэригэр өссө төгүл дириҥ убаастабылбытын биллэриэхпит, Ийэ дойду көҥүлүн уонна тутулуга суох буолуутун көмүскээбит дьону ахтыахпыт. Бу уопсай өйдөбүл, махтал уонна биһиги эппиэтинэспит күнэ — норуот хорсун быһыытын туһунан кырдьыгы харыстыыр уонна кэлэр көлүөнэлэргэ тиэрдэр эппиэтинэс», — диэтэ өрөспүүбүлүкэ Ил Дархана Айсен Николаев.

Кини бэлиэтээбитинэн, ааспыт сылга бу аахсыйа өрөспүүбүлүкэ 145 тыһыынчаттан тахса олохтооҕун түмпүтэ, онтон 95 тыһыынча кэриэтэ — улуустартан, 50 тыһыынчата —  киин куораттан. Саха сирэ 2025 сыл ахсынньытыгар «Арассыыйа Өлбөт үйэлээх полката» хамсааһын Бүтүн Арассыыйатааҕы пуорумугар «Сыл ситиһиитэ» номинацияҕа тиксибитэ. Сиһилии: www.sakha.gov.ru