Эр киһини быыһаабыт 9 саастаах уолчааны наҕараадалаатылар

Дьокуускайга бэҕэһээ, Аҕа дойду Дьоруойдарын күнүгэр, Уус Алдан улууһуттан сылдьар 9 саастаах Эрхаан Захаровы үөрүүлээх быһыыга-майгыга наҕараадалаатылар. Уолчаан уулуссаҕа инсуллаабыт биир дойдулааҕын быыһаабыт. Киниэхэ махтал суруктары, бэлисипиэди уонна наушнигы туттардылар диэн ЯСИА суруйар.

«Биһиги уолбутунан олус киэн туттабыт. Эрхаан сыанаҕа тахсарыгар долгуйбута. Сыаналаах бэлэхтэри Уус Алдан улууһун уонна Дүпсүн нэһилиэгин дьаһалталара туттардылар», — диэн Эрхаан эдьийэ Ангелина Захарова кэпсиир.

Ааспыт күһүн Эрхаан доҕотторун кытта оонньоон баран дьиэлээн иһэн, хотон аттыгар хаарга сытар эр киһин көрбүт. Уолчаан тута көмөлөһө сүүрбүт даҕаны, улахан киһини сатаан атаҕар туруорбатах. Онтон Эрхаан чугас олорор ыалларын ыҥырбыт. Кини хорсун быһыыны оҥорон, эр киһи тыыннаах хаалбыт, тута балыыһаҕа киллэрбиттэр.

Эрхаан Захаров Уус Алдан улууһун Бээди оскуолатыгар үөрэнэр.