Галина Данчиковаҕа И.Н.Барахов аатынан СӨ Судаарыстыбаннай бириэмийэтэ ананна

Бүгүн Судаарыстыбаннай Дуума дьокутаата, СӨ «Полярная звезда» уордьан хаһаайына, өрөспүүбүлүкэ норуотун хаһаайыстыбатын үтүөлээх үлэһитэ Галина Данчикова үбүлүөйдээх төрөөбүт күнүн бэлиэтиир.

Ил Дархан Айсен Николаев ыйааҕынан Галина Данчикова И.Н.Барахов аатынан СӨ Судаарыстыбаннай бириэмийэтинэн наҕараадаланна. Судаарыстыбаннай бириэмийэ Судаарыстыбаннай Дуума дьокутаатыгар Саха Өрөспүүбүлүкэтин социальнай-экэнэмиичэскэй сайдыытыгар уонна нэһилиэнньэ уйгута тупсуутугар туһуламмыт үгүс сылларга судаарыстыбаннай сулууспаҕа таһаарыылаах үлэтин иһин ананна.

“Мин Галина Иннокентьевнаны Саха сирин бэриниилээх патриотын быһыытынан билэбин. Кини өрөспүүбүлүкэ сайдыытыгар ис сүрэҕиттэн кыһаллар. Баай уопутун, киһи быһыытынан хаачыстыбатын Саха сирин олохтоохторо үрдүктүк сыаналыыллар. Бары күүһүн, айар кыаҕын, толкуйун бэйэтин дьыалатыгар  уурар. Саҥа каадыры өтө көрөн билэн, такайан, сөптөөх үлэ хамаандатын тэрийии – аҕыйах киһиэхэ маннык кыах бэриллэр ”, — диэн бэлиэтээтэ Айсен Николаев.

Галина Иннокентьевна Данчикова өрөспүүбүлүкэҕэ уонна федеральнай таһымҥа саамай эппиэттээх дуоһунастарга 40-тан тахса сыл үлэлээн кэллэ. 1972 сыллаахха финансовай-кредитнэй тиэхиньукуму бүтэрэн баран, Өлөөннөөҕү райфинотдел ыстаарсай иниспиэктэринэн үлэлээбитэ. Кэлин Верхоянскай оройуонун райфинотделыгар, Верхоянскайдааҕы райсовет  народнай дьокутааттарын Сэбиэтин финансовай отделын салайааччытынан, Верхоянскайдааҕы райсовет Президиумун бэрэссэдээтэлин солбуйааччытынан, Верхоянскай оройуонун баһылыгын солбуйааччытынан үлэлээбитэ.

1993 сылтан 2002 сылга диэри үп миниистирин солбуйааччытынан, бастакы солбуйааччытынан, миниистир эбээһинэһин толорооччунан үлэлээбитэ.  2002-2007 сылларга – СӨ Бырабыыталыстыбатын Бэрэссэдээтэлин солбуйааччынан – РФ Бэрэсидьиэнин иһинэн СӨ Бастайааннай бэрэстэбиитэлистибэтин бастакы солбуйааччытынан, 2007 — 2010  сылларга – СӨ Бырабыыталыстыбатын бэрэссэдээтэлин солбуйааччынан үлэлээбитэ. 2010 сыллаахха бэс ыйыгар  СӨ Бырабыыталыстыбатын Бэрэссэдээтэлинэн анаммыта. Бу кэм устата өрөспүүбүлүкэ сайдыытыгар уонна саха норуотун уйгута тупсарыгар үгүс үлэни ыыппыта.

2016 сылтан Галина Данчикова Саха сирин интэриэһин РФ Судаарыстыбаннай Дууматын үрдүк трибунантыттан көмүскүүр. Галина Данчикова сокуону оҥорор  көхтөөх үлэтин көмөтүнэн, РФ 130-тан тахса сокуона ылылынна. Олор истэригэр,  Саха сирин олохтоохторугар туһуламмыт “Хотугу сиргэ таһаҕаһы тиэрдии туһунан” Федеральнай сокуон.

Госдума дьокутаатын быһыытынан Галина Данчикова өйөбүлүнэн Арктика зонатыгар олорор оҕолору сынньалаҥынан хааччыйыыга уонна доруобуйаларын бөҕөргөтүүгэ үбү-харчыны улаатыннарыы, Дьокуускайга Онкология киинин тутуутун түмүктээһин уонна Өлүөхүмэ аэропордун саҥардыы, Дьааҥы улууһугар  биэрэги бөҕөргөтүү үлэтэ ыытылынна. Дьокутаат Галина Данчикова Саха сирин бүддьүөтүн бөҕөргөтүүгэ,  муниципальнай инфраструктураны сайыннарыыга, мэдиссиинэ өйөбүлүгэр, социальнай  газификацияҕа, тырааныспар боппуруоһугар  ураты болҕомтотун уурар.