ХААРТЫСКА: Дьокуускай пуордугар сымыыт атыыланар

“Дьокуускайдааҕы көтөрү иитэр баабырыка” хоту улуустарга сыһыаннаах биир үчүгэй дьаһаллаах. Ол курдук, Дьокуускай куорат аэропордугар кыра хоһу арыандаҕа ылан, сымыыты атыылатар. Биллэрин курдук, хоту улуустарга сымыыкка олус наадыйаллар. Онон куоракка кэлбит дьон, командировкаҕа барааччылар, ыалдьыттар итинтэн сымыыт атыылаһан барар кыахтаахтар.

Пассажир бэйэтин кытта үс ячейка сымыыты илдьэ барыан сөп. Ырыынактан, маҕаһыыннартан дуу атыылаһан, көтөҕөн-сосуһан тиийэринээҕэр, пуортан атыылаһан барара быдан судургу. Бу атыылыыр пуун субуота, өрөбүл күннэртэн уратыларга сарсыарда 5 чаастан күнүс 12 чааска диэри үлэлиир эбит. Эдэр кыысчаан хоту барааччыларга түргэнник сымыыт атыылаан, суулаан биэрэриттэн хотулар үөрэллэр.

Хаартыска: ааптар