Хабаровскайга госпиталга эмтэнэр байыастарга Саха сирин артыыстара кэнсиэрдээтилэр

Хабаровскай кыраайга баар госпиталларга эмтэнэр байыастарга уонна байыаннай чаастарга сулууспалыы сылдьааччыларга анаан Саха сириттэн айар бөлөх тиийэн кэнсиэрдээтэ. Бу туһунан Ил Дархан Айсен Николаев телеграм-ханаалыгар иһитиннэрдэ.

«Госпиталларга эмтэнэ сытар байыастарга духуобунай уонна моральнай өйөбүл күүс-сэниэ эбэр. Аҕа дойдуну көмүскээччилэр күннэрин көрсө Саха сириттэн артыыстар тиийэн кэнсиэрдээтилэр. Саха сириттэн эрэ сылдьар буолбакка, Уһук Илин атын эрэгийиэннэриттэн сылдьар байыастар эмиэ интэриэһиргээн сырыттылар, сэҥээрдилэр. Кинилэргэ анаан Иннокентий Васильев-Лэгэнтэй, Татьяна Соросова-Балаганчик уонна Василена Шарина-Улан нүөмэрдэри бэлэмнээтилэр», — диэн Айсен Николаев иһитиннэрэр.