ХІІ Уһук Илин эрэгийиэннээҕи «Серебряный лучник» бириэмийэ түмүгэ таҕыста

Олунньу 27 күнүгэр Хабаровскайга Тихоокеанскай cудаарыстыбаннай университет дьиэтигэр ХІІ Уһук Илин эрэгийиэннээҕи «Серебряный лучник»  түмүк тэрээһиннэрэ ыытылыннылар. Арассыыйа Уһук Илин уокурук бастыҥ коммуникационнай бырайыактарын аһаҕас көмүскээһиннэрин түмүгүнэн, Саха сирин икки бырайыага биһирэннилэр.

Ол курдук, «Бастыҥ култуурунай уонна сырдатар бырайыак» номинацияҕа «Туундара» анимационнай устудьуйа кэлэктиибэ «Саха сирин кыһынын туһунан 3D ойуулуктар» бырайыагын ситиһиилээхтик көмүскээтэ. Оттон «Территорияны сайыннарыы уонна өрө тутуу бырайыага» номинацияҕа Саха Өрөспүүбүлүкэтин инновацияларын сайыннарыы пуондатын «Арктическай стартап-экспэдииссийэтэ: Уһук Илин уонна Арассыыйа Арктиката» бырайыагынан кыайыылаах таҕыста.

«Уһук Илин эрэгийиэннээҕи бириэмийэ түмүгүнэн, Саха Өрөспүүбүлүкэтин уонна Хабаровскай, Приморскай кыраайдарын үс тутаах PR-оскуолаларыгар кыайыыны аҕалла. Бырайыактар лауреаттара креативнай индустриялары кытта сибээстээхтэр. Бу эмиэ Уһук Илин уокурук  дойду креативнай экэниэмикэтигэр биир тутаах эрэгийиэнэ буоларын чиҥэттэ», — диэн «Серебряный лучник»   дьүүллүүр сүбэ бэрэссэдээтэлэ Владислав Шулаев иһитиннэрдэ.

«Серебряный лучник» – Арассыыйа үрдүнэн биир саамай аптарытыаттаах уонна престижнэй PR-бириэмийэ. Бириэмийэ сүрүн сыала – уопсастыбанай сибээстэри сайыннарар Национальнай бириэмийэҕэ эрэгийиэннэр тэрилтэлэрин уонна исписэлиистэрин кыахтарын кэҥэтии уонна кытыннарыы.