Виртуоз-хомусчут Альбина Дегтярева Москваҕа аатырбыт оркестры кытта кэнсиэрдээтэ

Аан дойду виртуоз-хомусчута, «Айархаан» этно-бөлөх салайааччыта Альбина Дегтярева Москва куоракка Н.П. Осипов аатынан Арассыыйатааҕы норуодунай үнүстүрүмүөннэрин академическай оркестрын кытта кэнсиэрдээтэ, бу туһунан ЯСИА суруйар.

Саха сирин хомусчута тобус-толору көрөөччүлээх саалаҕа кэнсиэр саҕаланыытыгар хомуһунан оонньоон баран, оркестры кытта «Олоҥхо дойдутугар» композицияны толордо.

«Норуодунай бырааһынньык» кэнсиэр кулун тутар 12 күнүгэр П. И. Чайковскай аатынан кэнсиэртиир саалаҕа буолла. Кэнсиэргэ нуучча, татаар, еврей, кавказ, чуваш, башкир, карел, белорус уонна саха норуодунай ырыалара уонна матыыптара, ону таһынан операттан, киинэлэртэн муусука иһилиннэ. Альбина Дегтярева Николай Котов «Олоҥхо дойдутугар» композициятын толордо.

«Кэнсиэргэ норуодунай музыка бастыҥ холобурдара иһилиннилэр. „Норуодунай бырааһынньык“ тобус-толору сааланы хомуйда, көрөөччүлэр хас биирдии толорууну дохсун ытыс тыаһынан көрүстүлэр уонна артыыстары өр ыытыахтарын баҕарбатылар. Мин оркестр кэлэктиибин кытта киэһэ түмүгэр сыанаҕа таҕыстым. Биһиги муусукбаты олус дьүөрэлээн иһилиннэ. Дирижер, Арассыыйа  норуодунай артыыһа Владимир Андропов көрөөччүлэр тыыннаах муусука иһиллэрин өйдүүллэрин туһугар, кэнсиэр саҕаланыытыгар соҕотох оонньуурбар кыах биэрдэ, онтон оркестр холбосто. Аатырбыт устуоруйалаах  кэлэктииби кытта бииргэ сыанаҕа тахсар – улахан чиэс», – диэн санаатын үллэһиннэ Дегтярева.

Санатан эттэххэ, сэтинньигэ Альбина Дегтярева «Русские сезоны» диэн үрдүк таһымнаах бырайыакка кыттан, Арассыыйа норуодунай үнүстүрүмүөннэрин академическай оркестрын састаабыгар киирэн кэнсиэрдээбитэ.