Хорсун байыас дьонун-сэргэтин көрсөн барда

Булуҥ улууһун территориятааҕы быыбардыыр хамыыһыйатын чилиэнэ Евгений К. анал байыаннай дьайыыга Аҕа дойдуну уонна судаарыстыбаннай интэриэһи көмүскүү сылдьан, эр санаатынан хорсун быһыыны көрдөрөн, «Хорсун быһыы иһин» II истиэпэннээх мэтээлинэн наҕараадаланна.

Ол туһунан Булуҥ улууһун территориятааҕы быыбардыыр хамыыһыйа бэрэссэдээтэлэ Светлана Сацукевич биллэрбитин туһунан СӨ Киин быыбардыыр хамыыһыйата иһитиннэрэр.

Евгений анал байыаннай дьайыыга барыан иннинэ Тиксии бөһүөлэгин баһаарынай чааһыгар үлэлээбит, быыбар хамыыһыйатын актыыбынай чилиэнэ эбит. Кини анал байыаннай дьайыы саҕаланаатын дойдутун көмүскүү көҥүл өттүнэн барбыт. Бааһырыы кэнниттэн өр госпиталга эмтэнэн баран, төрөөбүт Тиксиитигэр кэлэ сылдьан, быыбар тэрийээччилэрин кытта көрсүбүт. Байыас билигин анал байыаннай дьайыыга төттөрү баран иһэр.

СӨ Киин быыбардыыр хамыыһыйа хорсун байыаһы, Аҕа дойдуну көмүскээччини судаарыстыбаннай наҕараадатынан эҕэрдэлиирин уонна кыайыы көтөллөөх дойдутугар эргиллэн кэлэригэр баҕарарын биллэрдэ.