Суут түмүгүнэн, Чомчоев кыайда!

Бүгүн иллэрээ сылтан соһуллубут суут түмүктэнэн, Анатолий Чомчоев кыайыыны ситистэ диэн үөрүүлээх сонун кэллэ. Учуонай, Саха сирин экологиятын туһугар туруулаһааччы Анатолий Чомчоевы билбэт киһи суоҕа буолуо.

Бастаан социальнай ситимнэринэн суут түмүгэ таҕыста – буруйдаах Ермолов суут саалатыттан тутуллан төттөрү хаайыыга барда диэн Чомчоевтар Кэнкэмэтээҕи ыаллара, уопастыбанньык Марина Платонова иһитиннэрбитэ. Ол кэннэ Анатолий Чомчоевы  кытары сибээстэһэн кэпсэппиппитигэр, сонун оруннааҕын бигэргэттэ. Үрдүкү Суут саҥа састаабынан көрөн, сиэрдээх быһаарыныыны таһаарда.

Анатолий Игнатьевич үс сыл дуу, биэс сыл дуу, уон сыл дуу Ермолов көҥүлэ быһыллан олорбутун иһин, онтон доруобуйам хайдах да төннүбэт диэн эппиттээх. Ол гынан баран буруйдаах ааһына сатаан кырдьаҕас киһини сүгүн олордубакка суукка хаста эмэ тиэһиннэрдэ.

Санатар буоллахха, икки сыл анараа өттүгэр кинини түүҥҥү түлүрбэхтэр, дьиэтигэр тиийэннэр өлөрө сыһаннар өрөспүүбүлүкэни бүтүннүү аймаабыттара, долгуппуттара. Ол эрээри киһи олоҕор суудайыылаах бу быһылаан суута араастаан иэҕиллэн уһуннук барда. Ол киһини бастаан Анатолий Чомчоев бэйэтэ ыппыт курдук силиэстийэлээн испиттэрэ. Бастаан утаа силиэстийэҕэ 105-с ыстатыйанан, ол аата киһини соруйан өлөрүү (умышленное убийство человека) диэнинэн салайтарбыттара. Ол эрээри, соруйан дуу, итирик сылдьан дуу диэнэ чуолкай биллибэтэ.

Кэлин ити буруйу 111-с ыстатыйанан ол эбэтэр доруобуйаҕа ыарахан быһыыны оҥорбут диэнинэн ыыппыттара. Онон үс сылга көҥүлүн быспыттара. Суут тоҕуста мунньахтаабыта. Анатолий Игнатьевич үс сыл дуу, биэс сыл дуу, уон сыл дуу көҥүлэ быһыллан олорбутун иһин, онтон доруобуйам хайдах да төннүбэт диэн, суут хос көрөрүгэр биэрбэтэҕэ. Хата анараа киһи апелляцияҕа биэрбитэ. Ол киһи  албакааттарын кигиилэринэн Анатолий Чомчоевы быарга охсон, бэстилиэтинэн ытыалаабытын олох да көтүртэрэ сатаабыта. Дьокуускай куорат суута хара маҥнайгыттан барытын хайдах баарынан сөпкө көрбүтэ. Оттон Үрдүкү Суукка күүстээх утарыта киирсии саҕаламмыта.Суут бырассыаһын кэмигэр итини букатын ыллара сатаабыттара.

Тиһэҕэр, ааспыт сылга буруйданааччыны көмүскэнээччигэ кубулутан, олох даҕаны көҥүл көччүйэр буолбута. Үрдүкү Суут уурааҕын Анатолий Чомчоев албакааттара Владивостоктааҕы 9-с Кассационнай суукка көтүттэрэн, хаттаан көрөргө уурбуттара.

Бүгүн Үрдүкү Суут сиэрдээхтик көрөн, буруйдаах Дмитрий Ермолов диэн киһийдэх төттөрү хаайыыга аттанна. Арыы үрдүгэр уу дагдайбатын, кырдьык үрдүгэр сымыйа ыттыбатын суут дакаастаата.