Биһиги оҕолорбут Бүтүн Арассыыйатааҕы үҥкүү күрэҕэр ситиһиилээхтик кытыннылар

Бу күннэргэ «Азия оҕолоро» оонньууларга кыттыахтаах үҥкүүһүттэр пааралара Бүтүн Арассыыйатааҕы күрэхтэһиигэ ситиһиилээхтик кыттан кэллилэр.

Арылхан Данилов уонна Миласлава Мазанова Санкт-Петербурга муус устар 24-29 күннэригэр ыытыллыбыт үҥкүү күрэҕэр «Юниоры-2» категорияҕа ситиһиилээхтик кытыннылар. Үҥкүүһүттэр күүстээх сүүмэрдээһини ааһаннар, 146 кыттааччыттан 50 миэстэни ыланнар, 1/8 финалга тиийбиттэр. Ол курдук латиноамериканскай бырагырааманан 193 хамаандаттан 59, европейскайга – 167 хамаандаттан 68-с буоллулар.

Быйылгы «Азия оҕолоро» оонньууларга Арылхан уонна Миласлава өрөспүүбүлүкэ чиэһин көмүскүөхтэрэ. Маннык таһымнаах күрэхтэһиигэ кыттыы спортсменнарга олус улахан суолталаах уонна сайдалларыгар кыаҕы биэрэр. Спортсменнар маннык күрэстэһии усулуобуйатыгар бэйэлэрин дьоҕурдарын, техникаларын сыаналыыр кыахтаналлар.

«Бу күрэхтэһиигэ кыттааччылар олус күүстээх этилэр. Биһиги оҕолорбут двоеборьеҕа 1/8 турнирга киирбиттэрэ уонна 146 паараттан 50-с миэстэ буолары ситистилэр. Олус күүстээх пааралар кыттыбыттарын учуоттаатахха, биһиги спортсменнарбыт олус үчүгэй көрдөрүүнү ситистилэр», — диэн сүүмэрдэммит хамаанда ыстаарсай тириэньэрэ иһитиннэрдэ.

Оттон «Реверанс» ТСК салайааччыта Нелли Лилло маннык эттэ: «Оҕолор олус маладьыастар. Өрөспүүбүлүкэ чиэһин маннык үрдүк таһымнаах күрэхтэһиигэ көмүскээбит уонна ситиһиилэммит кинилэр эрэ. Оҕолор «королевскай» бырагырааманы: европейскай уонна латиноамериканскай бырагырааматтан 10 үҥкүүнү үҥкүүлээтилэр. Күрэхтэһии таһыма олус үрдүк, Арассыыйа чөмпүйэнээтигэр курдук. Дойду бары эрэгийиэннэриттэн саамай күүстээх пааралар кэлэн кытыннылар. Итиниэхэ биһиги паарабыт «Юниоры-2» категорияҕа тохсунньу ыйтан эрэ кыттарын учуоттуохха наада. Оттон утарылаһааччылара иккис сылын кыттар буоланнар, уопуттаахтар, таһымнара үрдүк. Эһиил өссө инники миэстэҕэ тахсыахпыт диэн сананабыт».

Бэлиэтээн эттэххэ, бу турнирга Саха Өрөспүүбүлүкэтин үҥкүүгэ успуордун сойууһун бэрэсидьиэнэ Людмила Николаева кэлэн оҕолору өйөөн ситиһиигэ кынаттаата.