Ийэлэргэ 100 тыһыынча солкуобайы биэриэхтэрэ

2023 сылтан “Ийэҕэ үрдүк махтал” бэлиэнэн наҕараадаламмыт ийэлэргэ биирдэ бэриллэр төлөбүр – 100 тыһыынча солкуобай туттарыллыаҕа. Бу туһунан тустаах ыйаахха Ил Дархан Айсен Николаев илии баттаата.

“Ийэҕэ үрдүк махтал” бэлиэни өрөспүүбүлүкэ сайдыытыгар киллэрбит кылааттарын иһин, дириҥ ытыктабылы, үрдүк махталы биллэрэн туран, сыл аайы Ийэ күнүгэр 3 дьахтарга туттараллар.

Ил Дархан бу көҕүлээһинэ ийэлэргэ ытыктабылы, оҕону иитиигэ туохха да тэҥнэммэт өҥөлөрүн билиниини, дьиэ кэргэн сыаннастарын тарҕатыыны өссө кэҥэтиэҕэ, дириҥ суолталыаҕа.

Судаарыстыбаннай бэлиитикэҕэ ийэ-аҕа буолуу, оҕо төрөөһүнэ, дьиэ кэргэн бигэ туруктаах буолуута бастакы күөҥҥэ тутуллаллар. Онон ыытыллар бэлиитикэ дьиэ-уот, баай-дуол өттүнэн эрэ бөҕөргөтүүгэ туһуламмакка, дьиэ кэргэн сыаннастарын, үгэстэрин бөҕөргөтүүгэ, духуобунай, сиэр-майгы өттүнэн сырдатыыга, оҕону иитиигэ төрөппүт эппиэтинэһин үрдэтиигэ эмиэ туһуланар.

Ил Дархан, бырабыыталыстыба дьаһалтатын пресс-сулууспата.