Ил Дархан Айсен Николаев Нуучча тылын күнүнэн эҕэрдэлээтэ

Күндү Саха сирин олохтоохторо! Ис сүрэхпиттэн эһигини кэрэ бырааһынньыгынан – Нуучча тылын күнүнэн эҕэрдэлиибин, ону биһиги улуу бэйиэт уонна нуучча аныгы литературнай тылын төрүттээбит Александр Сергеевич Пушкин төрөөбүт күнүгэр бэлиэтиибит.

Бу күн аан дойду үрдүнэн мөлүйүөнүнэн дьону түмэр – бу тылынан саҥарааччылары уонна ону үөрэтээччилэри, литератураны таптааччылары уонна тыл кэрэтин таба сыаналааччылары. Нуучча тыла – бу көннөрү кэпсэтэр тэрил эрэ буолбатах. Бу устуоруйаны, култуураны уонна норуоттар духуобунай нэһилиэстибэлэрин тыыннаахтыы көрдөрөөччү.

Бу тыл көлүөнэлэри ситимниир, национальностар икки ардыларыгар сомоҕолоһууну бөҕөргөтөр уонна Арассыыйа уратытын көрдөрөр дьоһун чааһынан буолар. Кини кыаҕа уонна дириҥэ киһи өйүн-санаатын дьэҥкэтик көрдөрөр. Салгыы Ил Дархан Айсен Николаев бэйэтин эҕэрдэтигэр биһиги өрөспүүбүлүкэбитигэр нуучча тыла үөрэх, наука, судаарыстыбаннай сулууспа уонна уопсастыба кэпсэтиитигэр дьоһун оруолун бэлиэтээтэ. Ол курдук, Саха сиригэр нуучча уонна төрөөбүт тыллары өйөөһүҥҥэ уонна тэнитиигэ бырайыактар олоххо киирбиттэрин туһунан эттэ. Тустаах үлэҕэ судаарыстыба өйөбүлэ биллэрдик улааппыт. Бырагыраамалары сыллата өйөөһүн 100 мөлүйүөн солкуобайга диэри тиийбит. Бу көмөтүнэн “Великий.Могучий. Правдивый и свободный” декада олоххо киирбит.

Быйылгы сыл бэлиэ түгэнинэн биллэр учуонай, филолог-славист, фронтовик уонна педагог, Саха сиригэр гуманитарнай сайдыыга кылаатын киллэрбит Николай Георгиевич Самсонов 100 сылын бэлиэтээһин буолла. Бу даатаҕа “Северное сияние” өрөспүүбүлүкэтээҕи оскуола олимпиадатын уонна “Северное сияние” уонна “Гуманитарные науки в пространстве современной коммуникации” норуоттар икки ардыларынааҕы кэмпириэнсийэ ыытылыннылар.

Бэрэпиэссэр Самсонов аатынан бириэмийэни Өймөкөөн оройуонун нуучча тылын уонна литературатын учууталыгар Лариса Рыльченкоҕа туттарылынна”, — диэтэ бэйэтин эҕэрдэтигэр Ил Дархан Айсен Николаев.