Ил Дархан байыаннай дьайыы кыттыылааҕын дьиэ кэргэнигэр ыалдьыттаата

Ил Дархан Айсен Николаев Нерюнгрига байыаннай дьайыы кыттыылааҕын Александр Николаев  дьиэ кэргэнигэр сырытта. Быйыл  атырдьах ыйыгар өрөспүүбүлүкэ баһылыга байыас дьонугар командировкатын кэмигэр эмиэ ыалдьыттаабыта.

Александр Николаев байыаннай дьайыы кыттыылааҕа, кини ааспыт сыл күһүнүгэр мобилизациянан ыҥырыллыбыта. Билигин кини инники күөҥҥэ сылдьар.

Соторутааҕыта Айсен Николаев көрдөһүүтүнэн байыаннай сулууспалаах дьиэтин өрөмүөннээбиттэрэ. Ил Дархан кини  дьонун кэлэн иһэр саҥа дьылынан эҕэрдэлээтэ, байыас хайдах сулууспалыы сылдьарын уонна өссө туох көмө наадатын туһунан ыйытыласта.

«Бүгүн сарсыарда оҕонньорум сибээскэ тахса сырытта. Кини биһиги дьиэ кэргэммитин умнубаккытын иһин махтанар. Оҕолор саҥа өрөмүөннэммит дьиэҕэ киирэн наһаа үөрдүлэр», — диэтэ байыас кэргэнэ Наталья Николаева.

Кини бары тустаах өйөбүл миэрэлэрин уонна төлөбүрдэрин ыла олороллорун туһунан кэпсээтэ. Ону таһынан, саҥа «Нерюнгри» аэровокзал аһыллыбытыттан олус үөрэллэрин эттэ.

Николаевтар икки кыыс оҕолоохтор, өссө үһүстэрин кэтэһэллэр. Наталья иллэҥ кэмигэр иистэнэр, баайар, байыастарга наадалаах бородуукта бэлэмнээн ыытарга көмөлөһөр.