Ил Дархан Чурапчыга байыас дьиэ кэргэнин кытта көрүстэ

Ил Дархан Айсен Николаев Чурапчыга бара сылдьан, байыаннай дьайыы кыттыылааҕа Степан Б. кэргэнин, оҕолорун кытта көрүстэ.

Степан ааспыт сыл алтынньытыгар байыаннай сулууспаҕа хантараагынан барбыт. Урут доруобуйа харыстабылын эйгэтигэр уонна баһаары утары сулууспаҕа үлэлээбит. Биэс оҕото, кэргэнэ аҕаларын күүтэллэр.

— Кини дойдутун көмүскүөн наһаа баҕарара. Кини сэриилэһэ сылдьар кэмигэр, манна биһигини көрүөхтэрэ-истиэхтэрэ диэн эрэллээх этэ. Биһиги дьиэ кэргэммитигэр көмө оҥоһуллар, эрэгийиэннээҕи уонна федеральнай төлөбүрдэри ылбыппыт. Олох-дьаһах боппуруоһугар волонтердар, улуус дьаһалтатын, социальнай тэрилтэлэр үлэһиттэрэ көмөлөһөллөр. Аҕабытын кытта төлөпүөнүнэн кэпсэтэ турабыт. Кинини кытта хас да саха уолаттара бааллар. Барыта этэҥҥэ буолуо диэн эрэнэбит. Билигин оҕо көрөн олоробун, сааһыары үлэбэр тахсыам дии саныыбын. Миэбэл оҥорорунан дьарыктаныам, — диэн байыаннай сулууспалаах кэргэнэ кэпсээтэ.

Чурапчы улууһун баһылыга Степан Саргыдаев этэринэн, кинилэр дьиэ кэргэттэрэ патриотизм, көхтөөх уонна чөл олох холобура буолаллар.

— Бу элбэх оҕолоох дьиэ кэргэн  дьоҥҥо үтүө сыһыанынан, үлэҕэ, оҕону иитиигэ эппиэтинэстээҕинэн улууска биллэр. Степан мэлдьи инники күөҥҥэ сылдьааччы. Билигин кини биир дойдулаахтара, улуус дьаһалтата дьиэ кэргэнин болҕомто күөнүгэр тутабыт, — диэн кини эттэ.

Ил Дархан дьиэ кэргэн туох кыһалҕалааҕын туоһуласта, кэргэнигэр, оҕолоругар доруобуйа, оҕону иитии, сынньалаҥ чааһыгар көмө оҥоһуллуоҕа диэн эрэннэрдэ.

Өрөспүүбүлүкэҕэ байыаннай дьайыы кыттыылаахтарыгар, кинилэр дьиэ кэргэттэригэр көмө миэрэлэрэ үлэлииллэр, кэҥээн иһэллэр. Билиҥҥитэ араас хабааннаах 28 көмө миэрэтэ баар, ол иһигэр 2024 сылтан 8 көмө саҥа киирдэ.

Бэрэсидьиэн Владимир Путин байыаннай дьайыы кыттыылаахтарыгар, дьиэ кэргэттэригэр бары өттүнэн көмө оҥоһуллуохтааҕын туһунан бэлиэтээн эппитэ.

Айсен Николаев улуустарга үлэтинэн хас сырыытын аайы, байыаннай дьайыы кыттыылаахтарын дьиэ кэргэттэригэр сылдьар, кэпсэтэр. Бу көмө оҥорорго түргэнник быһаарыы ылынарга туһалаах.

Ил Дархан,бырабыыталыстыба дьаһалтатын пресс-сулууспата