Ил Дархан Дьокуускай куорат маастар-былаанын оҥорууну түргэтэтэргэ сорудахтаата

Ил Дархан Айсен Николаев Дьокуускай куорат агломерациятын маастар-былаанын олоххо киллэриигэ сүбэ мунньаҕы ыытта. Мунньахха өрөспүүбүлүкэ баһылыга былааннаммыт эбийиэктэр бырайыактыыр- симиэтэлиир докумуоннарын түргэнник оҥорорго сорудахтаата.

Бу туһунан СӨ Ил Дарханын уонна Бырабыыталыстыбатын пресс-сулууспата суруйар. 2030 сылга диэри маастар-былаан чэрчитинэн барыта 33 эбийиэги үлэҕэ киллэрэр былааннаахтар. Олор истэригэр социальнай, туризм, суол, о.д.а инфраструктура эбийиэктэрэ киирэллэр.

«Үлэ элбэх. Бырайыактыыр-симиэтэлиир докумуоннары оҥорууну киллэрэн туран, бэлэмнээһин үлэтин түргэтэтэргэ сорудахтаатым. Эбийиэктэр ыйыллыбыт болдьоҕун кэмигэр үлэҕэ киирэллэрин туһугар, бу үлэ түһүмэҕэ хойутааһына суох ыытыллыахтаах», — диэн Айсен Николаев бэлиэтээтэ.

Улахан эбийиэктэр ахсааныгар Өлүөнэ күргэтэ, «Полярная звезда» оҕо лааҕыра, «Эргэ куорат-2» бырайыагынан куорат историческай сирдэрин саҥардыыта киирэллэр. Маны тэҥэ доруобуйа харыстабылын улахан эбийиэктэрэ бааллар — Өрөспүүбүлүкэтээҕи инфекционнай килиниичэскэй балыыһа, психоневрологическай диспансер, 1 №-дээх поликлиника куорпуһа уо.д.а.

«Куорат сайдыытыгар саҥа эбийиэктэр эрэ буолбакка, успуорт, култуура уонна хаачыстыбалаах доруобуйа харыстабыла хайысхаларынан нэһилиэнньэ олоҕор табыгастаах усулуобуйаны тэрийии буолар. Дьокуускай куораппыт аныгылыы, тэтимнээхтик сайдарыгар сүҥкэн суолталаах», — диэн Ил Дархан бэлиэтээтэ.

Кэккэ дьаһаллары РФ Бэрэсидьиэнэ Владимир Путин көҕүлээбит саҥа национальнай бырайыактарга киллэрэр былааннанар.

Санатан эттэххэ, Владимир Путин стратегическай сайдыыга уонна национальнай бырайыактарга Сэбиэт мунньаҕын чэрчитинэн Уһук Илин куораттарын маастар- былааннарын национальнай бырайыактарга киллэрэргэ сорудахтаабыта. Дьокуускай уонна Нерюнгри куораттар маастар-былааннара 2021 сылга Илиҥҥи экэнэмиичэскэй пуоруму ыытыы түмүгүнэн биэрбит сорудахтарынан оҥоһуллар.