«Илин эҥээр» маҕаһыын дьиэтэ умайыытыгар буруйдааҕы буллулар

Былырыын ыам ыйыгар Дьокуускайга баар «Илин эҥээр» маҕаһыын кырыыһатыттан баһаар баран, Ленин уулуссатын 25-с №-дээх тоҕус этээстээх дьиэ уокка былдьаммыта. Дьокуускай  куорат мировой суута буруйдааҕы 50 тыһ. солк.ыстарааптаабыт. Бу туһунан Саха сирин госкомюстицията иһитиннэрэр.

Баһаартан сылтаан тахсыбыт хоромньу уопсай суумата — 24,8  мөл. солк. тэҥнэспитэ, ону сэргэ алта киһи эмсэҕэлээбитэ. Ол курдук госкомюстиция быһаарбытынан, ыам ыйын 4 күнүгэр, эр киһи үлэһиттэрин кытта «Илин эҥээр» маҕааһыын кырыыһатын өрөмүөннүү сылдьыбыттар. Кини үлэлииригэр рубероиды сылытаары гаас горелканы туһаммыт. Онуоха тыал үрэн, гаас горелка уота умайар матырыйаалга түһэн баһаар тахсыбыт.

Онон Арассыыйа Федерациятын холуобунай кодексатын 168 ыст. ( сэрэҕэ суох туттууттан атын киһи баайын-дуолун эмсэҕэлэтии, хоромньуну таһаарыы иһин) буруйдааҕынан аахпыттара. Ол эрээри эр киһи буруйун толору билинэн, ону сэргэ сааһын ситэ илик кыра оҕолордооҕунан уонна үлэһит, киһи быһыытынан үчүгэй көрдөрүүлээҕин иһин мировой судьуйа кинини 50 тыһ. солк. ыстарааптыырга уураахтаабыт. Буруйданааччы ыстараабын барытын толору төлөөбүт.