Иван Сивцев: «Дьонноох-сэргэлээх буоламмыт»

Уһун кыһыннаах, тыйыс тымныылаах дойдуга бары биир сомоҕо буолан, бэйэбит икки ардыгар хардарыта көмөлөсүһэн олоруохтаахпытын айылҕа барахсан бэйэтэ ыйан-кэрдэн биэрдэҕэ.

Уус Алданнарга, биһиэхэ, волонтердар хамсааһыннара тэриллэн, нэһилиэнньэ байыастары өйөөн харчы, ас-үөл, наадалаах мал-сал уонна таҥас-сап тиһиктээхтик ыыта олорор. Хас биирдии хамсааһыҥҥа, тэрээһиҥҥэ олохтоохтор бары саба түһэн көмөлүүллэр, кыттыһан ас астыыллар, таҥаска-сапка, малга-салга тиийэ хомуйан баһыылкалары ыыталлар. Манна барытыгар Дьокуускайга олорор биир дойдулаахтарбыт эмиэ туох кыалларынан көмөлөһөллөр. Соторутааҕыта баһыылкалар ыытылыннылар. Маныаха барытын хомуйан, наардаан бэлэмниир оҕо оонньуута буолбатах. Бу эмиэ сыраттан, түбүктэн тахсар, ситиһиллэр.

Байыаннай дьайыыга сылдьан бааһыран госпиталга сытар уолум Дүпсүн түмсүүтүгэр махтанар. Бу күннэргэ Дүпсүн баһылыга Сивцев Николай Николаевич анаан-минээн сылдьыбытын, ирэ-хоро сэһэргэспитин кэпсиир, үөрэр. Дүпсүн дьонун-сэргэтин аатыттан саха быһаҕын туттарбыт уонна хас да толору астаах-таҥастаах пакеты хаалларбыт.

Кини кэпсиирин истэ олорон, мин уруккута өрөспүүбүлүкэ таһымнаах салайааччыны — Сивцев Г.Г. санаан кэллим. Тоҕо диэтэххэ, кини төрөппүт уола Сивцев Сергей Гаврильевич Дүпсүн түмсүүтүн иилиир-саҕалыыр. Былырыын кини миигин соһутан да, үөрдэн да турардаах. Ол курдук, ахсынньы аам-даам тымныытыгар туманы быыһынан Дьокуускайга Мархаҕа чааһынай дьиэлэр быыстарыттан биһигини булан, байыаннай дьайыыга сылдьар уолбутугар диэн анаан бэлэх туттарбыта. Билэр киһим оҕото аҕатын курдук кыһамньылаах салайааччы буолан эрэриттэн наһаа үөрэ, астына санаабытым. Эрэнэбин, билигин үлэлии сылдьар нэһилиэк эдэр салайааччылара хас биирдии ыалга, олохтооххо кыһамньылаах сыһыаннарыгар. Нэһилиэккэ кырдьаҕастарыгар сыл аайы көмөлөһөллөр. «Ойуурдаах куобах охтубат, дьонноох киһи тутайбат» диэн ону этэн эрдэхтэрэ.

Байыаннай дьайыыга сылдьан бааһыран Москва госпиталыгар эмтэнэ сытар уолбутугар сылдьан кэпсэтэн, дойдутун аһын бачча ыраахтан сүгэн-көтөҕөн илдьэннэр, саллаат санаатын көтөхпүттэрэ ыарыытын мүлүрүтэрэ чуолкай. Биһиги, төрөппүттэр, махталбытын тиэрдэбит Дүпсүн нэһилиэгин баһылыгар Сивцев Николай Николаевичка, Дүпсүн түмсүү салайааччытыгар Сивцев Сергей Гаврильевичка уонна  ас-үөл астаан кэһиилэрин ыыппыт дьоммутугар, нэһилиэк бары олохтоохторугар. Баҕарабыт таһаарыылаах үлэни, туйгун доруобуйаны. Дьонноох-сэргэлээх буоламмыт өйөбүллээхпит, инникигэ эрэллээхпит.

Иван Сивцев — Бээди
Хаартыска: Н.Н.Сивцев тиксэриитэ