Казахстан бэрэсидьиэнинэн иккиһин Касым-Жомарт Токаев талылынна

Казахстан Өрөспүүбүлүкэтигэр бу өрөбүллэргэ бэрэсидьиэн быыбара буолан ааста. Куоластааччылар баһыйар үгүс бырыһыаннарын ылан, Касым-Жомарт Токаев иккиһин бэрэсидьиэнинэн талылынна.

Быыбар түмүгүнэн, кини туһатыгар казахтар 80-тан тахса бырыһыан куоластаатылар. Касым-Жомарт Токаев утарылаһааччылара икки-үс бырыһыаны эрэ ыллылар. Быыбарга дьон кэлиитэ 70-тан тахса бырыһыан. Бу — Казахстан быыбарын историятыгар олус үчүгэй көрдөрүү.

Санатан эттэххэ, Касым-Жомарт Кемелевич 2019 сыллаахха бэрэсидьиэнинэн талыллыбыта. Кинини бу быыбарга Казахстаны отучча сыл салайан олорбут бастакы бэрэсидьиэн Нурсултан Назарбаев өйөөбүтэ. Оччолорго кини быыбардааччылар 70-тан тахса куоластарын ылбыта.

РФ бэрэсидьиэнэ Владимир Путин Касым-Жомарт Токаевы быыбарга кыайыытынан эҕэрдэлээтэ. Кини бэлиэтииринэн, Касым Кемелевич бар дьонун итэҕэлин ылан, иккиһин бэрэсидьиэнинэн талылынна. Арассыыйа уонна Казахстан доҕордуу сыһыаннаһыыларыгар бу эмиэ биир суолталаах хардыы.