Кэбээйи улууһун Сайылык нэһилиэгэр саҥа оскуола аанын аста

Кэбээйи улууһун Сайылык нэһилиэгэр 275 миэстэлээх И.Е.Левин аатынан оскуола тутуллан бүттэ. Барыта 4287,4 кв.м иэннээх саҥа оскуола РФ Бэрэсидьиэнэ Владимир Путин көҕүлээбит «Үөрэхтээһин» национальнай бырайыагынан тутулунна. 

Оскуола аһыллыытын үөрүүлээх чааһа кулун тутар 12 күнүгэр буолла. Саҥа оскуолаҕа оҕо үөрэнэригэр, эбии үөрэхтээһини ыларыгар бары усулуобуйалар тэрилиннилэр. Бастакы этээскэ уолаттарга анаан «үлэ» уруогун кылааһа, кыргыттарга «домоводство» кылааһа бааллар. Уолаттар тимиринэн уонна маһынан уһаналларыгар анаан араас ыстаныактары туруордулар. Барыта аҕыс үлэлиир миэстэ баар.

Итиэннэ бастакы этээскэ алын кылаастар үөрэнэр блоктара, мэдиссиинэ хоһо, успуорт саала бааллар. Оттон иккис этээскэ — үрдүкү кылаастар үөрэнэр кэбиниэттэрэ, лабораториялар, аактабай саала, лингафоннай кэбиниэттэр, информатика кэбиниэтэ, суунар, таҥас уларыттар хостор.

Бу сылга 6 уһуйаан уонна 18 оскуола үлэҕэ киирэрэ күүтүллэр.