Көбөкөҥҥө — Эбээ күнэ

Айыыһыт ыйын атаара, Нам улууһун Көбөкөн нэһилиэгэр, саха балаҕаныгар, Эбээ күнэ бэлиэтэнэн ааста.

Оҕолор саха омук маанылаах астарын: тэптэрии саламааты, күөрчэҕи, алгыстаах алаадьыны эбээлэрин кытта тэҥҥэ астаан, дуоһуйа амтаһыйан астынан тарҕастылар.

Тэрээһини иилээн-саҕалаан ыыппыт нэһилиэк уһуйааччыта Федотова Ирина Семеновна Айыыһыт ыйа туох бэлиэлээҕин, итэҕэллээҕин сэһэргээтэ. Оҕолор олус болҕомтолоохтук истэн элбэҕи иҥэриннилэр, биллилэр.

Көбөкөн орто оскуолатыгар балаҕан ыйыттан саҕалаан нэһилиэк наставниктара тэрийэннэр ыйга биирдэ Эбээ, Эһээ уруоктара буолаллар.

Эбээлэр Слепцова М.И., Петрова Л.В., Жиркова Л.Н., Петрова А.Н. оҕолору алаадьы, саламаат буһарарга үөрэттилэр, чөчөгөйүнэн күөрчэх ытыйдылар.

Тэрээһин бириэмэтигэр «Бастыҥ өтө көрөөччү» (кумааһынньыкка баар харчыны таайыы) уонна «Бастыҥ түгэн» оҕолорго күрэхтэр буоллулар.

Манна оҕолорго бириискэ нэһилиэк кырдьаҕастарын Сүбэтэ спонсордаата.

Тэрээһиҥҥэ улахан көмөнү оскуола эбээтэ Бурнашева Н.И. оҥордо.

Көбөкөн нэһилиэгин пресс-киинэ