Кэлэр сыллааҕы өрөмүөн бырагыраамата чопчуламмыт

Бүгүн “СӨ ОДьКХ” ГУП генеральнай дириэктэрэ В.С.Чикачев сылааһынан хааччыйар  тэрилтэлэр кыстыкка хайдах киирбиттэрин, инники былааннарын туһунан пресс-кэмпириэнсийэни тэрийдэ.

Сэтинньи 15 күнүгэр диэри кыстыкка бэлэм буолуу бары докумуоннарыгар илии баттаммыт. Өрөмүөн бырагырааматынан 100 хочуолу, 150 оборудованиены уларыппыттар. Тэрилтэ хайы-үйэ эһиилги сылын торумнаабыт — 2024 сыллааҕы  өрөмүөн бырагырааматын чопчулаабыт. Манна куонкуруһу биллэрэн, ахсынньы саҕаланыыта түмүгэ биллиэхтээх. Оччоҕо турбаны, хочуоллары, носуос тэриллэрин уонна да атын матырыйааллары хааччыйааччылар биллиэхтэрэ. Ону тэҥэ хочуолунайдара оттугунан хааччылларын ситиһэр туһуттан кыһыҥҥы суолу таба уонна көдьүүстээхтик туһанар санаалахатар.  Онон кыһыҥҥы суол аһылынна даҕаны муус устар ыйга диэри хоту сытар улуустарга оттуктара тиэрдиллиэҕэ. Илин эҥэр улуустарга таһаҕаһы тиэйии усулуобуйата арыычча ордугунан сибээстээн, сайыҥҥы  кэми уонна уустук суоллаахтарга кыһыҥҥы суолу туһаныахтара.

Виталий Семенович бэлиэтииринэн, кыстыкка бэлэм буолуу пааспарын филиаллар бары ылбыттар.

Өссө биир киһи кэрэхсиирэ – оттуктарын тиэйии суолун чэпчэтиини тобулуу. Ол курдук,  ороскоуту чэпчэтээри таас чохтоох Дьабарыкы Хайаттан Баатаҕайга диэри 800 км массыынанан тиэрдэр санаалаахтар. Кыһыҥҥы суолунан хайы-үйэ боруобалаан тиэйбиттэр. Онон суол аһылыннаҕына, бу үлэ ыытыллыаҕа. Оччоҕо уунан Алдан, Өлүөнэ өрүстэринэн Лаптевтар муораларыгар киирэн, Дьааҥы барыгар тиийиэр диэри 3200 км айаннаан тиийэр таас чох сиринэн 800  км тиэрдиллэр кыахтаныаҕа.

Хоту Муомаҕа уонна Абыйга ньиэби Өлүөхүмэттэн, таас чоҕу Зырянкаттан Халыманан, Индигиринэн тиэйэр буоллахтарына, Муома Соболооҕор таас чохтоох сири туһанар баҕалаахтар. Манна 57 мөл туонна саппаастааҕа биллэр. Ити кыалыннаҕына, Муома уонна Абый оройуоннарын чугастыы хааччыйар кыаллыаҕа, ороскуот да аччыаҕа.

Өс өбир үтүө сонун — Дьокуускайга бөҕү харайар полигон бастакы түһүмэҕин тутууну “СӨ ОДьКХ” ГУП-ка сүткэриллэн, ити былааны толорон, Ростехнадзор Ленскэйдээҕи управлениетын  бирикээһэ тахсыбыт.

Арктика улуустарыгар бөҕү уматар установкалары туруорууга үлэ ыытыллар эбит. Холобура, Аллайыаха улууһун баһылыга биир бастакынан итини туруорсубут.

Быйыл ГУП итиинэр хааччыйар 700 эбийиэги кыстыкка бэлэмнээбит, хомунаалынай инфраструктураны саҥардыбыт.

Эбээн Бытантай улууһугар тиит маһы дробилкаҕа үлтүрүттэрэн  ылыллар матырыйаалынан үлэлиир хочуолунай Кустуурга  тутуллар буолбутун иһиттибит. Бу ГУП устуоруйатыгар суох ураты быраактыка өссө 2019 с. бу улуус Дьарҕаалааҕар олоххо киирбит эбит.  Олохтоохтор сүрдээх барыстаах уонна туһалаах диэн кэпсииллэрин истэн турабыт. Ол да иһин аны Кустуурга ититэр ситимнээх мас көөбүлүнэн (щепа) оттуллар саҥа хочуолунайы тутуу туһунан ыйаахха илии баттаннаҕа диэн сэрэйиллэр.

Онон генеральнай дириэктэр Виталий Чикачев сайдыы саҥа суолларын тобулууга өссө да ылсан үлэлиир баҕалаахтарын биллэрдэ.