«Көр бутугаска» күүтэллэр

Арассыыйаҕа Дьиэ кэргэн, Сахабыт сиригэр Оҕо саас сылларынан өрөспүүбүлүкэбит икки үбүлүөйдээх норуодунай тыйаатырдара (“Көөчөөн көрө” – 35, “Дьиикимдэ дьээбэлэрэ” – 25 сыллара) алтынньы 19 күнүгэр Дьокуускайга А.Е.Кулаковскай аатынан норуоттар доҕордоһууларын дьиэтигэр киэһэ “КӨР БУТУГАС” кэнсиэрдэригэр күүтэллэр.

Бу күн тыйаатырдар уолаттарын, кыргыттарын атастаһа сылдьан оонньуохтара. Бу бэйэтэ эмиэ туспа, ураты. Манна эбэн эттэххэ, өссө кыттыыны ылан тэҥҥэ оонньуохтара артыыстар төрөппүт оҕолоро. Бу киэһээ дьиэ кэргэнинэн кэлэн астына-дуоһуйа сынньанаргыт биһирэнэр.

Оттон ити күн саамай бастыҥ көрөөччү буолан бэлэх тутуоххун баҕараҕын дуу?

Эрдэлээн иһитиннэрдэххэ, тыйаатырдар салайааччылара Били киһи уонна Анна Охлопкова соһуччу бэлэхтэрдээхтэр. Онон кэтэһиҥ, көхтөөх көрөөччү буоларга кыһаллыҥ.

Артур Егоров,

Мытаах, Горнай.