Кириһиэнньэ сөтүөтүгэр оптуобустар дьону таһыахтара

Дьэ, Саҥа дьыллааҕы бырааһынньыктарбыт бүттүлэр, аны Кириһиэнньэ хаалла. Тохсунньу 18-20 күннэригэр Дьокуускайга Кириһиэнньэ сөтүөтэ саҕаланыаҕа. Манна оптуобустар дьону таһыахтара диэн Дьокуускай куорат дьаһалтата иһитиннэрэр.

Кириһиэнньэ сөтүөтэ, үгэс курдук, Күөх Хонуунан киирэн, Өлүөнэ өрүс боротуохатыгар буолар.

Куорат суолга-тырааныспарга сулууспатын салайааччы Эдуард Садовников иһитиннэрбитинэн, оптуобустар Мэҥэ уот турар Марат болуоссатыттан сөтүө буолар сиригэр диэри илдьэн биэриэхтэрэ, төттөрү аҕалыахтара. Күөх Хонуунан быһалыы сылдьыахтара. Оптуобус айанын сыаната үрдээбэтэ — 40 солкуобай.

Үгэс курдук, Кириһиэнньэ сөтүөтүн ойбонун кириэс быһыылаах гына оҥороллор, таҥара дьиэтиттэн кэлэн сибэтии гыналлар, таҥнарга сылаас балаакка баар буолар, ЫБММ үлэһиттэрэ куттала суох буолууну хааччыйаллар.

Бу кэмҥэ күн-дьыл кыратык сылыйара күүтүллэр — -30-тан тахса кыраадыс буолуохтаах. Урукку сылларга -50 кыраадыс буоллаҕына да, христианскай итэҕэллээх дьон толлубаттар этэ.

Кириһиэнньэҕэ ойбоҥҥо бэлэмнээх, итэҕэллээх эрэ дьон киирэллэр, мээнэ муустаах  ууга киирии доруобуйаҕа охсуулаах буолуон сөп.