Космонавтика түмэлин үйэ аҥардаах үбүлүөйэ буолла

Тохсунньу 26 күнүгэр Уус Алдан улууһун Иван Николаевич Жирков аатынан Дүпсүн орто оскуолатыгар бэлиэ күн буолла. 1974 сыллаахха, үйэ аҥаарын аннараа өттүгэр биһиги оскуолабытыгар Саха сиригэр маҥнайгынан Космонавтика түмэлэ тэриллибитэ.

Бу үбүлүөйдээх сылы оскуоланан эрэ буолбакка, бүтүн нэһилиэгинэн бэлиэтииргэ былааннаах үлэ ыытыллыытын саҕалыыр ураты күн буолла. Ол курдук, оскуолабытыгар үөрүүлээх линейка тэрилиннэ. Оскуола дириэктэрэ Надежда Дорофеева быйыл туох ыытылларын кэпсээтэ. Ордук чуолаан, дэриэбинэбит скверигэр баар бөртөлүөт аттыгар өссө самолет кэлэн туруохтааҕын туһунан истэн биһирээтибит. Ону космонавтика куруһуогун маҥнайгы иитиллээччитэ Копырин Николай Степанович көҕүлээн аҕалар эбит. Кыра кылаас оҕолоро хоһоон ааҕан, оскуола выпускниктара ырыа ыллаан, “Кэскил” ансаамбыл хомуска дьүрүскэнин истэн, оскуола лидердэрин көхтөөх үҥкүүтүнэн үөрүүлээх линейкабытын түмүктээтибит.

Кристина ЯБЛОВСКАЯ.