Биллиилээх скульптор Василий Бочкарев төрөөбүтэ 80 сылыгар аналлаах тэрээһин буолла

Олунньу 9 күнүгэр Уус Алдан улууһун Дүпсүн орто оскуолатыгар Саха Өрөспүүбүлүкэтин норуодунай худуоһунньуга, биир дойдулаахпыт, скульптор, поэт, суруналыыс В.В. Бочкарев төрөөбүтэ 80 сылыгар аналлаах тэрээһин буолан ааста.

Тэрээһини саха тылын, литэрэтиирэтин, оскуола бибилэтиэкэтин «Тэгил» мэтэдиичэскэй холбоһуга, Дүпсүн нэһилиэгин бибилэтиэкэтэ сүрүннээн ыыттылар. Методхолбоһук салайааччыта Михайлова Тамара Семеновна, бибилэтиэкэрдэр Евдокия Васильевна Атласова, Прасковья Иннокентьевна Сивцева оҕолорго Василий Васильевич олоҕун, айар үлэтин туһунан кэпсээтилэр, араас дэгиттэр талаанын билиһиннэрэн сэһэргээтилэр. Ол курдук, оҕолор кини суруйбут кинигэлэрин, аатырбыт дьоннор бюстарын оҥорбутун биллилэр-көрдүлэр.

Маны таһынан В.В. Бочкарев 80 сылыгар анаан оскуола оҕолоругар оҥоһук уонна хаартыска күрэхтэһиитэ буолла. Кыайыылаахтар хайҕал сурук, харысхал, минньигэс бириис ыланнар үөрдүлэр-көттүлэр. Арассыыйаҕа аатырбыт Суриков аатынан художественнай институту бүтэрбит, сүүһүнэн ааҕыллар үлэлэрдээх, киэҥник биллибит скульптор биир дойдулаахпытынан киэн туттан, астынан тарҕастыбыт.

Дайаана АФАНАСЬЕВА, 10-с кылаас үөрэнээччитэ.