“Креасфера+” куонкурус кыайыылаахтара быһаарылыннылар

Кулун тутар 19 күнүгэр “Үлэ кыбартаала” креативнай кластерга буолбут  “Креасфера+” куонкуруска  сыыппара технологиятын ньыматынан  уруһуйдуур өрөспүүбүлүкэ бастыҥ  худуоһунньуктарын быһаардылар.

Сүүмэрдиир туур  кыттыылаахтара баара-суоҕа 4 чаас иһигэр ускуустуба биллэр айымньыларын 2D-графиканы, векторнай бырагыраамалары, бэл,  е 3D-моделированиены туһанан уруһуйдаатылар. Кыайыылаахтарга 50 тыһыынчаҕа тиийэ суумалаах сэртипикээттэри уонна сыаналаах бэлэхтэри туттардылар.

«Креасфера+» куонкурус “Муус устар” ыччат V бэстибээлин чэрчитинэн аан бастаан ыытылынна. Куонкуруһу Саха сирин сайдыытын корпорацията, Үүнэр көлүөнэ паарката уонна АЛРОСА алмааһы хостуур хампаанньа тэрийдилэр.

Барыта сүүстэн тахса худуоһунньук (14-35 саастаах)  кытынна. Кинилэр сыыппара ньыматынан  живопистарын уонна графикаларын Аҕа дойду Улуу сэриитигэр Кыайыы 80 сылыгар, анал дьайыы байыастарыгар уонна патриотизм тиэмэтигэр анаатылар. Кинилэртэн финалга 24 эрэ кыттааччы: Дьокуускайтан уонна өрөспүүбүлүкэ 5 улууһуттан (12 оҕо уонна 12 улахан киһи) таҕыста.

Кинилэр кулун тутар 18-19 күннэригэр сыыппаранан айар үлэ салаатыгар эспиэрдэр үөрэтэр интенсивтэригэр  дьарыктаннылар. Худуоһунньуктар 4 чаас иһигэр араас кэм уонна араас дойду ааптардарын скульптураларыттан  уонна хартыыналарыттан бэйэлэрин истииллэринэн  саҥа үлэлэри айан таһаардылар.

Худуоһунньуктар үлэлэрин көмүскүүллэригэр  бэйэлэрин концептарын, талан ылбыт истииллэрин уонна туһаммыт үнүстүрүмүөннэрин туһунан кэпсээтилэр. Куонкурус үлэлэрин ортолоругар  Виктор Васнецов “Бухатыырдар” хартыынатынан  саха боотурдара, Илья Репин үлэтинэн  кэлии киһи Чужой, саха худуоһунньуга  Андрей Чикачев “Эбэм ытарҕалара” хартыынатыгар олоҕуран хоррор, Грант Вуж “Американскай готика” хартыынатынан кэргэннии Симпсоннар уо.д.а. бааллар. Хас да уруһуйдьут “Аркейн” сэрийээл истилиистэкитигэр  тирэммит.

Аанньал статуэта уонна тапталлаахтар

 Сыыппараҕа уруһуйдуур  эдэр худуоһуньуктарга бастакы миэстэни “Синергия” иккис кууруһун устудьуонката Эмилия Терешкина Джозев Кристиан Лейендекер аанньалын скульптуратын уруһуйдаан ылла.

«Мин худуоһунньуктар куонкурустарыгар кыттарга аан бастаан быһаарынным. Урут,  тоҕо эрэ,  ханна да кыайыам суоҕа дии саныырым. Манна даҕаны номинация эрэ ыларга  эрэл кыыма баара. Онтон мин бастакы миэстэни ылбытым туһунан биллэрбиттэригэр бастаан олох итэҕэйбэтим. Миэхэ 50 тыһыынча солкуобайы биэрдилэр! Түүл курдук. Лейендекер – мин олус сөбүлүүр худуоһунньугум, кини мин санаабын көтөҕөр. Кини истиилинэн тугу эмэ оҥоруохпун баҕарар уонна боруобалыыр этим. Ордук аанньал статуэтын оҥоруохпун баҕарарым. Ол гынан баран, миэхэ  скил тиийбэт дии саныыр этим. Онтон оҥорорго быһаарынным. Бу мин бастыҥ холонуум дии саныыбын, онон киэн туттабын. Лейендекер үксүгэр сюжеттаах  хартыыналары уруһуйдуур, онон мин дохсун үөрүүнү  көрдөрөөрү эдэр тапталлаахтары эбэн биэрдим”, — диэн Эмилия Терешкина кэпсиир.

Кини  куонкурус бастакы түһүмэҕэр “Бу кыайыы” сыыппаралаах хартыынатыгар кыайыыны аҕалбыттарын хойут билбит саллааттары уруһуйдаабыта.

Эмилия Терешкина кэпсээбитинэн, сыыппара ньыматынан оҕо сааһыттан, бастакы кылааска маҥнайгы смартфонун ылыаҕыттан уруһуйдуур. Кини билигин аниматорга үөрэнэр уонна хас да сылы быһа толкуйдуу сылдьыбыт көрдөөх-нардаах мультипликационнай киинэтин  оҥоруон баҕарар.

Бизонунан көтүү

 35-гэр диэри саастаахтарга кыайыылааҕынан Мэҥэ Хаҥалас улууһун Майа сэлиэнньэтин “Кэрэли” оҕону эбии үөрэхтээһин киинин педагога Сардаана Егорова ааттанна. Кини Иннокентий Корякин хартыынатын «Аватар: Легенда об Аанге» сэрийээл истиилинэн оҥордо.

«Соторутааҕыта  дьиэ хомуйа сылдьаммын “Саха” НКиХ биэриитигэр Иннокентий Корякины кытары кэпсэтиини истэн аһарбытым. Кини оҕо сылдьан тиэргэнин үрдүгэр көппүтүн туһунан кэпсээбитэ. Мин оҕустартан олус куттанабын. Ол гынан баран, Иннокентий Корякин оҕустара  наһаа кырасыабайдар, үчүгэй таһаалаахтар. Куонкуруска кыттарбар көтөр оҕус уобараһын санаан кэлбитим уонна мин оҕо сааспар туох кэрэхсэбиллээх баар этэй диэн толкуйдаабытым.

Мин тастыҥ эдьиийбин кытары  түүннэри көрөр мультипликационнай киинэлэрбит ортотугар  «Аватар: Легенда об Аанге» баар этэ. Сүрүн дьоруой Аанг уонна кини Аппа бизона сатаан көтөллөр. Мин Аанг таҥаһын уларытан, саха култууратын санатар, сэрийээлгэ баар уу удьуорун быһыытыгар-майгытыгар  уларыттым. Үлэбин болдьохтоох бириэмэ 5 мүнүүтэ иннинэ бүтэрдим”, — диэн Сардаана Егорова кэпсээтэ. Кини  «Креасфера+» куонкурус бастакы түһүмэҕэр  «Предок» хартыынаны оҥорбута.

««Предок»  уруһуйу оҥорор санаа эмискэ киирбитэ. “Кэрэли”  кииҥҥэ оҕолору дьарыктыырбар мин оҕолор Кыайыы 80 сылын тиэмэтигэр уруһуйдуулларыгар көрдөспүтүм, кинилэри көҕүлүүр туһугар хас да эскиһи торумнаабытым.  Дьиктитэ диэн, аан бастаан  бу хартыына уобараһын оҥорбутум. Мин оҕо эрдэхпинэ төрөппүттэрим дьиэ кэргэнинэн түспүт  эргэ хаартыскаларын көрөрбүн санаан кэлбитим. Бэйэтин төрүттэрин, Сэбиэскэй сойуус Дьоруойун уруһуйдуур кыыһы оҥорбутум. Мин кыра оҕо курдук сатаан уруһуйдаабаппын. Онон, миэхэ ыалдьыттыы киирэр кырачаан ыалым кыыс  уруһуйуттан ылбытым. Кини уруһуйа  биһиги холодильникпытыгар өр турбута. Кэлин бэйэм хартыынабын кини ийэтигэр ыыппытым уонна кини кыыһын уруһуйа мин үлэм сорҕотунан буолбутун туһунан суруйбутум”, — диэтэ кыайыылаах.

Сардаана Егорова карьератын оҥостуон иннинэ үгэс буолбут ньыманан уруһуйдуура, онтон 18 сааһыгар графическай планшеттаммыта уонна алта сыл анараа өттүттэн сыыппараҕа уруһуйунан идэлээх таһымҥа дьарыктанан барбыта.

«Бу куонкуруска талааннаахтык уруһуйдуур үөрэнээччилэр уонна эдэр дьон кытыннылар. Сорох үлэлэри олус сөхтүм. Ол үлэлэр ааптардарын кытары манна билистим, кинилэр  наһаа көрдөөхтөр. Наҕараадалааһын сиэригэр-туомугар “Синергия” устудьуоннарын кытары бииргэ олордум уонна Эмилия Терешкина бастакы миэстэ буолбутун иһитиннэрбиттэригэр олус үөрдүм. Кини хампаанньата дохсун ытыс тыаһынан эҕэрдэлээтэ. Бу кэнниттэн тута улахан дьоҥҥа кыайыылаахтары биллэрдилэр уонна мин ааппын ааттаатылар. Онуоха мин туттуммакка, үөрүүбүттэн кыргыттары кытары хаһыытаспыппыт, бэл, төлөпүөммүн ыһыктан кэбиспитим”, — диэн Сардаана Егорова үөрүүтүн үллэстэр.

Ньурба улууһуттан кыайыылаах хамаанда кыттааччыта Дайаана Тихонова архитектуранан бастакы кылаастан дьарыктанар. Туох эрэ саҥаны уонна кэрэхсэбиллээҕи айарын олус сөбүлүүр. Дайаана “Муус устар” бэстибээлгэ кыттар ыра санаата быйыл туолла. Сүрүнэ – саҥа үөрүйэҕи ылынна.

«Бу бэстибээл миэхэ архитектураҕа уонна 3D-дизайҥҥа саҥа саҕахтары арыйда. Саллаат күөлүгэр паарка бырайыагын оҥорорбутугар байыаннай устуоруйаны уонна мифология элэмиэннэрин холбоотубут. Бу —  мин идэҕэ таһыммын үрдэтэрбэр ураты уопут. Куонкурус миэхэ олус элбэх саҥа санааны, толкуйу уонна билиини биэрдэ. Мин санаабар, ыччаты өйөөһүн олус суолталаах. Биһиги хамаандабыт пуондаҕа уонна АЛРОСА-ҕа өйөбүллэрин иһин улахан махталын тириэрдэр. Эһиги аһымал санааҕа үлэҕитин уонна уопсастыба сайдыытыгар кылааккытын сыаналыыбыт. Эһиги көмөҕүт дьоһун оруоллаах уонна биһиги ыччаттарбытыгар биллэр туһаны аҕалла. Мин билиибин уонна үөрүйэхпин салгыы тупсарарга үлэлиэм”, — диэн Дайаана үөрэ-көтө кэпсээтэ.

14-17  саастаах кыттааччыларга кыайыылаахтар:

I миэстэ – Эмилия Терешкина;

II миэстэ – Надежда Лугинова;

III миэстэ – Анастасия Дъяконова.

17-35 саастаах кыттааччыларга кыайыылаахтар:

I миэстэ – Сардаана Егорова;

II миэстэ – Николай Тимофеев;

III миэстэ – Лидия Иванова.

14-17 саастаах кыттааччыларга номинациялар кыайыылаахтара:

«Полное погружение» – Хаарчаана Гермогенова;

«Прорыв воображения» – Артур Васильев;

«Мастерство без границ» – Динара Фомина;

«Сила эмоций» – Валерий Мельник;

«Чистый стиль» – Дайаана Толстоухова.

17-35  саастаахтарга номинациялар кыайыылаахтара:

«Полное погружение» – Милена Корнилова;

«Прорыв воображения» – Александра Алексеева;

«Мастерство без границ» – Ангелина Апросимова;

«Сила эмоций» – Айсара Отова;

«Чистый стиль» – Саргылаана Готовцева.

Нарыйа ПАХОМОВА суруйуутуттан тылбаас