Култуура сылын логотибын билиһиннэрдилэр

Бүгүн, олунньу 12 күнүгэр, Саха Өрөспүүбүлүкэтигэр биллэриллибит Култуура сылын сырдатыыга, тэрийсиигэ аналлаах  “төгүрүк остуол” суруналыыстары кытары ыытылынна.

“Төгүрүк остуолу” СӨ култуураҕа уонна духуобунай сайдыыга миниистирэ Афанасий Ноев ыытта. Сүрүн кэпсэтии, дьүүллэһии иннинэ кини Култуура сылын логотибын билиһиннэрдэ.

Логотип ааптара – байыаннай дьайыы бэтэрээнэ, Арассыыйа дьоруойдарын хорсун быһыыларын туһунан “Алеша” ойуулугу  уонна комикстар серияларын оҥорбут Ростислав Павлов.

Логотип саха норуотун уруккутун, билиҥҥитин уонна кэлэр кэскилин ситимниир дириҥ ис хоһоонноох. Сүрүн ойуутунан саха үгэс буолбут халандаарын графическай уруһуйа буолар (СӨ Култуураҕа уонна духуобунай сайдыыга министиэристибэтин бэлиэтиттэн ылыллыбыт). Халандаар ортотугар баар иигэ Култуура сылын сырдатар  күн бэлиэтэ баар. “Култуура” диэн тыл каллиграфическай буочарынан суруллубут. Логотип төрүттэрбитигэр ытыктабыллаах сыһыаны уонна инникигэ дьулуһууну көрдөрөр.

“Төгүрүк остуол” сүрүн соругунан Култуура сылыгар нэһилиэнньэни култуура көҕүлээһиннэригэр кытыннарарга уонна иһитиннэриилэри тириэрдэргэ уопсастыбаннаһы, сонуну киэҥник тарҕатар сириэстибэлэри кытары хардарыта бииргэ үлэлээһин көдьүүстээх ньымаларын дьүүллэһии буолла.

Афанасий Иванович Култуура сылын Кэнсиэпсийэтин уонна ыытыллыахтаах сүрүн тэрээһиннэри билиһиннэрдэ.

Кэпсэтии кыттыылаахтара, суруналыыстар социальнай ситимнэргэ үлэлээһин култууратын, култуура тиэмэтин сырдатыыга туох мэһэйдэр баалларын, суруналыыстар үлэлэрэ хаачыстыбалаах буоларын туһугар ханнык өйөбүллэр баар буолуохтаахтарын уо.д.а. дьүүллэстилэр.

Афанасий Ноев маннык көрсүһүүлэр туһалаахтарын бэлиэтээн туран, Култуура сылын бары тэрээһиннэригэр  култуура үлэһиттэрэ эрэ буолбакка, бары хайысха үлэһиттэрэ уонна нэһилиэнньэ көхтөөхтүк кыттарын, Култуура сылыгар бэйэтин кылаатын киллэрсэрин туһугар уопсай сүбэнэн таһаарыылаахтык үлэлииргэ ыҥырда.