Кутанаҕа Аан дойду дьахталларын күнүгэр волейбол мээчигэ кыырайа көттө

Олохтоох дьаһалта (баһылык Давыдов Н.В., спортинструктор Архипов А.Н.), Кутанатааҕы «Биир ньыгыл Арассыыйа»   салаатын  (секр. Егорова Н.Т.), Кутанатааҕы «Матери России» (сал. Оконешникова Т.И.) көҕүлээһининэн, тэрийиитинэн,  Аан дойду дьахталларын күнүгэр аналлаах Кутана нэһилиэгин түөлбэлэрин кэрэ аҥаардарын икки ардыларыгар волейбол күрэҕэ буолан ааста.

Күрэх күнүс 12:00 чаастан А.А.Иванов-Күндэ аатынан Кутана орто оскулатын спортивнай саалатыгар ыытылынна. Тэрээһин  чөл олоҕу пропагандалааһын, тыа сирин олохтоохторугар волейболу тарҕатыы, салгыы сайыннарыы уонна күүстээх хамаандалары булуу сыаллаах ыытылынна.

Тэрээһин саҕаланыытыгар Кутана нэһилиэгин баһылыга Николай Давыдов, спортинструктор Аял Архипов маҥнайгы сааскы бырааһынньыгынан кыттааччылары, саалаҕа мустубут кэрэ аҥаардары эҕэрдэлээтилэр, сибэкки дьөрбөтүн бэлэх уунан долгуттулар.

 

Кутанатааҕы «Матери России» салайааччыта Тамара Оконешникова түмсүүтүн аатыттан «Саамай элбэх оҕолоох оонньоочуга» «Күндэ-Үрэх үрдэ» хамаанда кыттааччытыгар, 6 оҕолоох эдэр ийэҕэ Алена Меркурьеваҕа, эдэр-эмэн сааһыттан күрэхтэһиилэргэ үгүстүк кыайыы үөрүүтүн билбит, миэстэлэспит, билигин сааһырыы боруогун атыллаабыт волейбол бэтэрээнигэр, «Саамай саастаах оонньоочуга», «Күндэ-Үрэх үрдэ» хамаанда кыттааччытыгар Татьяна Афанасьеваҕа бэйэтин бэлэҕин туттаран үөртэ. Көхтөөх олоҕунан олорорго киһи төһө-хас саастааҕа мэһэйдээбэтэ арылхайдык көһүннэ. Сааһырыыны киэр кыйдыыр бэтэрээннэр эдэрдии эрчимнэринэн, тулхадыйбат тулааһыннарынан барыбытын кынаттыыллар!

 

Кутанатааҕы «Биир ньыгыл Арассыыйа»  первичнай отделениетын секретара Нюргуяна Егорова Дария Васильеваҕа, Елена Федосееваҕа кыргыттары, дьахталлары волейболга көҕүлүүллэрин иһин махтанан, бэйэтин, «Биир ньыгыл Арассыыйа»  баартыйа аатыттан бэлэх туттаран долгутта.

Барыта 4 хамаанда турда: түөлбэлэртэн 3 хамаанда, 1 оскуола оскуола оҕолорун хамаандата. Оонньууну иилээн-саҕалаан кылаабынай судьуйа, Кутана нэһилиэгин спортинструктора Архипов А.Н. ыытта. Бастакы оонньууттан саҕалаан бэрт хатыһыылаах киирсиилэр буоллулар.  Өрөбүлү өрөбүл, бырааһынньыгы бырааһынньык диэн аахсыбакка, көрөөччүлэр кэлэн, хаһыытаан-ыһыытаан оонньуулары сытыырхатан биэрдилэр. Аэлита Александрова хаҥас илиитинэн «подачата», мээчиги чэпчэкитик ылара барыбытын сөхтөрдө. Бары да кыттааччылар ох курдук оҥостон  бэлэмнэнэн, олус үчүгэйдик оонньоон көрөөччүлэри астыннардылар, кыраһыабай оонньуулары көрдөрдүлэр.

 

Бу курдук олус сытыы, тыҥааһыннаах киирсиилэр түмүктэринэн «Дьулуур-Сайдыы» түөлбэ (кап. Васильева Д.А.) хамаандата бастаата, 2-с миэстэни «Ньургуһуннаах Үрдэл» (кап. Федосеева Е.Р.) түөлбэ ылла уонна 3 миэстэҕэ оскуола кыргыттарын хамаандата (кап. Фокинова В.С.) тигистэ, «Күндэ-Үрэх үрдэ»(Семенова М.А.) ситиһиилээхтик кытынна. Тирии мээчиги таах күөрэтэ сылдьар дьон  таһымнара олох үрдүк, кэрэ аҥаардар эр дьонтон хаалсыбакка оонньууллар эбит, дьарыктаахтара, биир хамаанданан оонньуу үөрэммиттэрэ тута харахха быраҕыллар.

Кыайыылаахтарга «Биир ньыгыл Арассыыйа»  первичнай отделениетын аатыттан Грамоталар, сертификат, сыаналаах бириистэр туттарылыннылар. Оҕолорго Кутана орто оскуолатын  төрөппүт кэмитиэтэ  бэлэх туттардылар. Күрэхтэһиини көрө олорон элбэх да киһи волейболу таптыыр, сэргиир, оонньуур эбит диэн санааҕа кэлэҕин. Сааскы дьиэ иһинээҕи-таһынааҕы үлэ элбэҕин үрдүнэн, бу күрэх үрдүк таһымнаахтык, бэлэмнээхтик ааста.

Тэрийээччилэр Кутана орто оскуолатын дьаһалтатыгар спортивнай саалаларын көҥүллээбиттэригэр улахан махталбытын биллэрэбит.

 

 Нюргуяна Егорова