Кутанаҕа — “Таптыыбын эбээт, атастаар” литературнай киэһэ

А.А.Иванов-Күндэ төрөөбүтэ 130 сылыгар уонна Төрөөбүт төрүт тыл, сурук-бичик күнүгэр аналлаах “Таптыыбын эбээт, атастаар” литературнай киэһэ Сунтаар Кутанатыгар ыытылынна.

Литературнай киэһэ икки чаастан турда, бастакы чааһыгар хоһоон түһүлгэтэ, иккис чааһыгар «Дьиктилээх хонуу» интеллектуальнай оонньуу буолла. Хоһоон түһүлгэтэ Кутанатааҕы «Алгыс» култуура киинин худруга Валентина Архангельская сценарийынан турда. Биэчэр саҕаланыытыгар «Алгыс» култуура киинин звукооператора Илья Потапов бэйиэт Күндэ курдук таҥнан-саптан, тутта сылдьыбыт малларын таһыгар А.А.Иванов-Күндэ оруолун толорон, Күндэ «Төрөөбүт тыл» хоһоонун ааҕан дьону сөхтөрдө.

Күндэ айымньыларын Валентина Архангельская, Кутана үлэһит ыччата Илья Потапов, Айталина Иванова, Юрий Егоров, Анатолий Кузьмин, хомоҕой хоһооннордоох, Кутана айар талааннааҕа Ньургустаана Иванова-Сыдьаайа дорҕоонноохтук, иһирэхтик аахтылар. Антонида Гаврильева Күндэҕэ анаан айбыт хоһоонун мустубут дьон-сэргэ астына иһиттилэр, дохсун ытыс тыаһын бэлэхтээтилэр.

Поэт, прозаик, драматург, тылбаасчыт, литературнай критик, лингвист-ученай, публицист Алексей Андреевич Иванов–Күндэ 1896 сыллаахха тохсунньу 16 күнүгэр Сунтаар улууһун Хаҥалас нэһилиэгэр төрөөбүтэ. 

Тэрээһин иккис чааһыгар «Күндэ айымньыларыгар умнуллубут тылларынан» диэн  «Дьиктилээх хонуу» интеллектуальнай оонньуу буолла. Манна нэһилиэк түөлбэлэриттэн көхтөөх  дьон кыттыыны ыллылар. Оонньуу 3 түһүмэхтэн: финалтан, супер-оонньууттан, көрөөччүлэри кытта оонньууттан турда. Бастакы түһүмэххэ «Үрэх үрдэ» түөлбэ олохтооҕо Вадим Ефимов («Сатанах» диэн тылы таайан), иккис түһүмэххэ «Дьулуур» түөлбэ олохтооҕо Айталина Иванова («Кыайах» диэн тыл),  үһүс түһүмэххэ «Ньургуһун» түөлбэ олохтооҕо Марианна Додутова («Хоноҕостор» диэн тыл) кыайан финалга күөн көрүстүлэр. Көрөөччүлэргэ анаан оонньууга «Кырдаайы» диэн тылы барыларыттан бастакынан  Валентина Пахомова таайан, «Азбука» маҕаһыыннар ситимнэрин директора Нина Васильевна Семенова спонсордаабыт бирииһинэн наҕараадаланна. Финалы «Үрэх үрдэ» түөлбэ олохтооҕо Вадим Ефимов «Биитэй» диэн тылы таайан супер-оонньууга  кыттарга чиэскэ тигистэ. Төһө да супер-оонньууга  «Чэччинньиэр ойуур» диэн тылы таайбатар,  Кылаан кыайыылааҕынан Вадим Ефимов буолла.

 

Мустубут дьон ураты, интэриэһинэй ис хоһоонноох тэрээһинтэн астынан, махтанан тарҕастылар. Өссө да маннык интэриэһинэй биэчэрдэри тэрийэ тураарыҥ диэн баҕа санааларын эттилэр.

Нюргуяна Егорова