Кыайыы параадыгар аҕыс дойду лиидэрдэрэ кэлиэхтэрэ

Сарсын, ыам ыйын 9 күнүгэр, дойду киин куоратыгар сарсыарда  10:00 чаастан  (Москва бириэмэтинэн)  Кыһыл болуоссакка Кыайыы 79 сылыгар анаммыт үгэскэ кубулуйбут параад саҕаланыаҕа.

Кыайыы параадын көрө  дойду Аҕа баһылыга Владимир Путин ыҥырыытынан  Белоруссия, Казахстаан, Киргизия, Таджикистан уонна Туркменистан лиидэрдэрэ кэлиэхтэрэ, ону кытта Куба бэрэсидьиэнэ Мигель Диас-Канель Бермудес, Лаос бэрэсидьиэнэ Тхонглун Сисулит уонна Гвинея- Бисау Өрөспүүбүлүкэтин бэрэсидьиэнэ Сисоку Эмбало ыҥырыллыбыттара диэн сонуну киэҥник тарҕатар ситимнэр суруйаллар.

Санаттахха, РФ Оборуонатын миниистирэ Сергей Шойгу иһитиннэрбитинэн, Кыайыы параадыгар 9 тыс. тахса киһи, 70-тан тахса байыаннай тиэхиньикэ, ону сэргэ «Русские витязи» уонна «Стрижи» көтөр аал бөлөхтөрө кыттыахтара.

Параад кэмигэр дойду Бэрэсидьиэнэ Владимир Путин тыл этиитигэр 8 мүнүүтэ ыытыллара былааннанар, былырыын аҕа баһылыга паарадка 10 мүнүүтэ устата тыл эппитэ биллэр. 9 тыһ. кэриҥэ киһи ахсааныгар суворовскай, нахимовскай уонна кадетскай училищелар курсааннара, эдэр армеецтар, дьахтар-байыаннай сулууспалааччылар уонна хаһаахтар кытталлара күүтүллэр. Итини сэргэ Кыһыл болуоссатынан быйыл анал байыаннай дьайыы кыттыылаахтара хаамыахтара.

Быйыл араас байыаннай тиэхиньикэ ортотугар аан бастакытын К-53949 «Феникс» бронированнай массыына көрүүгэ тахсыаҕа. Ону кытта З-СТС «Ахмат» уонна АМН-590951 «ВПК-Урал» байыаннай массыыналары сүүрдүөхтэрэ.

Бу иннинэ биллибитинэн, Саха сириттэн Арассыыйа Дьоруойа, «Сулус» үөрэтэр-эрчийэр киини салайар Александр Колесов Москваҕа Кыайыы Параадыгар ыҥырыылаах ыалдьыт быһыытынан кыттыыны ылыаҕа. Ону сэргэ Үөһээ Бүлүү улууһун Сургуулук нэһилиэгин баһылыга  Алексей Тарасов  уола Алексей  Улуу Кыайыы күнүгэр параадка байыаннай дьайыы кыттыылаахтарын ортолоругар хаамыаҕа.

Бырааһынньыктааҕы тэрээһин байыаннай оркестр толоруутугар «Прощание славянки»  үгэскэ кубулуйбут ырыанан түмүктэниэҕэ.