«Кыайыы Знамятын» Хоро нэһилиэгэр көрүстүлэр

Бүгүн, олунньу 18 күнүгэр,  Улуу Кыайыы былааҕын “Бары бииргэ – Кыайыыга!” эстэпиэтэ чэрчитинэн Үөһээ Бүлүү улууһун Хоро нэһилиэгэр көрүстүлэр.

Кыайыы былааҕа Бүлүү улууһуттан үс күн анараа өттүгэр Үөһээ Бүлүү улууһугар кэлбитэ. Бүгүн Хоро нэһилиэгэр тиийэн , орто оскуола саалатыгар үөрүүлээх көрсүү сиэрэ-туома өрө көтөҕүллүүлээхтик буолан ааста. Үөһээ Бүлүү улууһун иннинэ «Кыайыы Знамята» номнуо өрөспүүбүлүкэ 14 улууһугар сырытта.

«Кыайыы Знамята» эстэпиэтэ Хороҕо кэлиитэ ситэриилээх былаас уорганнарын отчуотун кэмигэр түбэһэн, оробуочай бөлөх үөрүүлээх тэрээһиҥҥэ кытынна.
Бэлиэ тэрээһиҥҥэ тыыл бэтэрээннэрэ, сэрии сылын оҕолоро, бойобуой дьайыылар кыттыылаахтара, оскуола үөрэнээччилэрэ кыттыннылар.

«Улуу Кыайыы 80 сылын көрсө саҕаламмыт эстэпиэтэ бүгүн Хоро нэһилиэгэр кэллэ. Салгыы мантан эстэпиэтэни Ньурба улууһа тутуо. Дойдубут эйэлээх олоҕун иһин сэриилэспит Кыайыы бэтэрээннэрин ытыктыыр, кинилэр тустарынан эдэр көлүөнэҕэ өйдөтө-саната сылдьарбыт биһиги ытык иэспит. Билигин анал байыаннай дьайыыга биһиги уолаттарбыт, Кыайыы иһин уолаттарбыт хорсуннук кытталлар. Онон «Кыайыы Знамята» өрөспүүбүлүкэ үрдүнэн айана “Бары бииргэ — Кыайыыга!” диэн девизтээх ыытылла турара олус суолталаах», — диэтэ улуус баһылыга Валерий Николаев.

Тэрээһин үөрүүлээх чааһын Улуу Кыайыыны уһанса сылдьан, сырдык тыыннарын толук уурбут буойуттары кэриэстээн аастылар.